Мүрү нэһилиэгин уонна Майа сэлиэнньэтин дьаһалталара үлэ уопутун атастаһаллар

Кулун тутар 24 күнүгэр, Майа сэлиэнньэтигэр уопут атастаһар, үлэ хаамыытын көрөр-истэр, сибээс олохтуур сыаллаах Уус Алдан улууһун Мүрү нэһилиэгин олохтоох дьаһалтатыттан баһылык солбуйааччыта Вероника Сивцева, юридическай уонна быраап боппуруостарыгар кылаабынай исписэлиис Розалия Петухова, социальнай уонна имиджевэй бэлиитикэҕэ исписэлиис Фаина Антонова, уопсастыбаннай түмсүүлэри кытары үлэҕэ исписэлиис Екатерина Бочкарева ыалдьыттаатылар.

«Майа сэлиэнньэтэ» тыа сирин түөлбэтин баһылыга Алексей Неустроев итиэннэ олохтоох дьаһалта үлэһиттэрэ бэйэлэрин салааларыгар үлэни хайдах быһыылаахтык тэрийэллэрин, ыытылларын туһунан сиһилии үллэһиннилэр.

Салгыы «Түмэн» уопсастыбаннай түмсүү кыттыылаахтара анал байыаннай дьайыыга сылдьар буойуннарга күннэтэ көмө, өйөбүл оҥорор үлэлэрин уонна «МайаRUN» салайааччыта Александра Мохначевская сэлиэнньэҕэ чөл олоҕу, успуорду көҕүлүүр, дойдубут ыраах куораттарыттан, өрөспүүбүлүкэбит улуустарыттан кэлэн кыттыыны ылбыт ыалдьаттардаах таһымнаах тэрээһиннэри кэпсээтилэр, боппуруостарыгар хоруйдаатылар, сүбэ-ама биэрдилэр.

 

Вероника Сивцева, Мүрү нэһилиэгин баһылыгын солбуйааччы:

– Бүгүн биһиги Майа сэлиэнньэтигэр уопут атастаһар үһүс сырыыбыт буолар. Быйыл нэһилиэктэн түмсүүлэри, түөлбэлэри кытта үлэлиир тустаах исписэлиистэр буолан кэллибит. Бастакы көрсүһүүгэ уопсай билсиһии буолбута, иккис сырыыга граннарга, бырайыактыыр үлэлэр хайысхалаларынан кэлэ сылдьыбыппыт.

Көрсүһүү айыы үлэһиттэри уонна кинилэр үлэлэрин кытта олус үчүгэйдик билсэбит, элбэх саҥа сүүрээннэри үөрэтэбит. Маннык курдук улахан сэлиэнньэ үлэтин туораттан сэргии көрөбүт.

Инникитин да тыа сирин олохтооҕун олоҕун уйгутун үрдэтиигэ, сайыннарыыга туһуламмыт үлэни ыытарга ситиммитин быспакка үтүө түмүктэрдээх, ситиһиилээх сылы баҕарабын, – диэн санаатын үллэһиннэ.

 

Евдокия Семенова, «Түмэн» уопсастыбаннай түмсүүгэ сиэккэ баайыытын салайааччыта:

– Кулун турар саҕаланыаҕыттан биһиэхэ сэлиэнньэ 19 түөлбэлэрэ үлэлэһэннэр 300-н тахса миэтэрэ сиэккэни баайдыбыт. Туох баар матырыйаалларын, туттар тэриллэрин барытын бэйэлэрин киэнин аҕаланнар көмөлөстүлэр. Онтон салгыы тэрилтэлэр кэлэллэр. Сыл саҕаланарыгар СВО-ҕа сылдьар буойуннарга бастакы көмө, өйөбүл баартыйа барбыта, билигин иккиһи бэлэмнии сылдьабыт. Биһиэхэ артиллерист уонна пехотинец кэлэ сылдьаннар саллааттар махтал тылларын тиксэрбиттэрэ.

Анал байыаннай дьайыыга сылдьар уолаттарга көмөбүт бара турар. Кинилэр этэҥҥэ төннөн кэллиннэр, сэриибит уурайарыгар диэн баҕа санаалаахпыт, – диэн иһитиннэрдэ.

 

Ариадна Филиппова, «Түмэн» уопсастыбаннай түмсүүгэ иис сыаҕын салайааччыта:

– СӨ «Илии сылааһа» иистэнэр сыахха уонна түмсүүгэ ааспыт ыйга 8 көрүҥ 39 таҥаһы бэлэмнээбитим. Холобура, балаклава, снуд, флис бэргэһэ, хлопок таҥастан көстүүм, сэлиэччик, о.д.а. сылаас уонна тымныы кэмнэргэ кэтэр таҥастары тигэбин. Билигин бу күннэргэ улуустан СВО-ҕа кытта сылдьар уолаттарга гуманитарнай көмө барарыгар таҥастары бэлэмнии сылдьабын. Анал байыаннай дьайыы саҕаланыаҕыттан буойуннарбытыгар анаан тыһыынчаттан тахса кэриҥэ таҥас-сап тиктим буолуо, – диэн үлэтин билиһиннэрдэ.

 

Людмила Пивоварова, «Түмэн» уопсастыбаннай түмсүү чилиэнэ:

– «Сэбиэскэй» түөлбэни 30 сыл салайан кэллим. Дьонум сүрдээх көхтөөхтөр. Харчынан кыттыһан Дьокуускай куоракка киирэн эбии 54 миэтэрэ матырыйаалы ыламмыт сиэккэ өрө сылдьабыт. Тус үлэлээх дьон буоланнар, быыс булан син биир бэйэлэрин кылааттарын киллэрэллэр. Анал байыаннай дьайыы саҕаланыаҕыттан түөлбэм олохтооҕун Александра Романовна Дашееваны кытта биир да күнү көтүппэккэ сиэккэ баайыытыгар үлэлии сылдьабыт.

Олохтоохторо баар балаһыанньаны сөпкө өйдүүллэр. Сэлиэнньэттэн түөлбэнэн уонна биирдии бэйэлэрэ баҕа өттүлэринэн кыттаннар, үлэбит сүрдээҕин тахсыылаах буолла, – диэн эттэ.

Иван Лукин.