Быйыл улууска оттук кэмэ балаҕан ыйын 9 күнүттэн саҕаланар. Бу күннэргэ олох-дьаһах, хомунаалынай хаһаайыстыба үлэһиттэрэ 2025-2026 сыллаах кыстыкка бэлэмнэнии үгэнигэр сылдьаллар.
Мэҥэ Хаҥаласка 39 гааһынан, 23 чоҕунан оттуллар хочуолунай баар. Хочуолунайдартан дьиэлэргэ, тэрилтэлэргэ 130 км тахса уһуннаах ититии уонна 52 км уу ситимэ тардыллан турар.
Владислав Тен, «Олох-дьаһах, хомунаалынай хаһаайыстыба» ГУТ Мэҥэ Хаҥаластааҕы салаатын прораба:
– Өрөмүөн, кыстыкка бэлэм үлэтэ кыраапык быһыытынан бара турар, матырыйаалынан хааччыллыы үчүгэй. Майаҕа, Хаптаҕайга саҥа тутуллан үлэҕэ киирэр элбэх кыбартыыралаах дьиэлэр ититии, уу ситимнэригэр холбоноллор. Бүгүҥҥү күҥҥэ нэһилиэктэргэ хочуоллар өрөмүөннэрин, ситимнэргэ турбалары бүрүйүү үлэлэрэ ыытыллар, – диэн иһитиннэрдэ.
Иван Лукин.
