Быйылгы кыстык хайа да сыллааҕар ынах сүөһүгэ, сылгыга этэҥҥэ ааста. Ааспыт сайын от үчүгэйдик үүнэн уонна хаачыстыбата үчүгэй буолан, кыстыкка улахан өлүү-сүтүү тахсыыта бэлиэтэммэтэ.
Кыстык устата 108 ынах туһата суох өлбүт буоллаҕына, былырыын баччаҕа ити көрдөрүү 289-ка тэҥнэспит эбит. Ол иһигэр 30 тэрээһиннээх, 43 кэтэх уонна 18 бааһынай хаһаайыстыбаларга. Ыччат сүөһүгэ ырыганнааһынынан былырыын 58 сүөһү охтубут эбит, быйыл ‒ 6.
Кыстык устата ынах 11 торбостоон улуустааҕы ветеринарнай лабораторияҕа киирэн чинчилиннилэр. Ол түмүгүнэн сыстыганнаах ыарыы, холобур бүрүсүлүөс баара бэлиэтэммэтэ.
Ыам ыйын 29 күнүнээҕи туругунан, барыта 4206 ньирэй төрөөтө, ити былырыыҥҥы көрдөрүүттэн 257-нэн аҕыйах.
Сылгы кыстыгар быйыл хаарбыт аһара халыҥнык түспэккэ, халлааммыт улаханнык тибиилэммэккэ, дьылбыт сымнаһыар буолла. Быйылгы кыстыкка 36 сылгы көнньүнэн өлүүтэ таҕыста. Былырыын баччаҕа 124 сылгы охтубута. Ыам ыйын 10 күнүнээҕи туругунан, сылгы төрүөҕэ 2870 буолла. Былырыын 1538 кулуннаах этибит.
14 кулуннаабыт биэ үөскэҕэ улуустааҕы ветеринарнай лабораторияҕа киирэн чинчиллэн анаалыстарыгар сыстыганнаах ыарыылар көстүбэтилэр.
Быйылгы сайыммыт үүнүүлээх, өҥ дьыл кэлэн эһиилги кыстыкка ураа муостаахпытын, сыспай сиэллээхпитин энчирэппэт курдук дьаһаныаҕыҥ.
Николай Лукин, ветеринарнай управление сүрүннүүр исписэлииһэ.