Муус устар 25-27 күннэригэр Сахалин куоракка «САХАЛИН 6.0» норуоттар икки ардыларынааҕы робототехникаҕа чөмпүйэнээт буолан ааста.
Чөмпүйэнээт «Молодежь и дети» национальнай бырайыак чэрчитинэн Арассыыйа Үөрэҕин министиэристибэтин интеллектуальнай дьоҕуру сайыннарар тэрээһиннэригэр киирэн кыттааччыларга үрдүк ирдэбили туруорар. Хамаандалар чөмпүйэнээккэ кыттар сайаапканы биэриэх иннинэ олорор эрэгийиэннэригэр сүүмэрдиир түһүмэҕи ааһаллар.
Быйылгы чөмпүйэнээккэ Арассыыйа 50 эрэгийиэниттэн, ону тэҥэ Кыргызстантан, Узбекистантан 2000 кэриҥэ кырачаан инженер мустан күөн күрэстэстэ. Саха сириттэн «Лига открытий» категорияҕа Амма Алтаныттан «Кэскил», Мэҥэ Хаҥаластан «Кэнчээри», Горнайтан «Кырачаан ымыылар», Бүлүү куоратыттан «Алмазик», «Кустук», Бүлүү Дьөппөнүттэн «Ыллыкчаан», Ньурба куоратыттан «Кыталык», «Кэскил», Ньурба Малдьаҕарыттан «Чуораанчык», Ньурба Антоновкатыттан «Биһик», Жатайтан «Василек», Намтан «Чэчир» уһуйааннар кытыннылар. «Лига знаний» саҥа категорияҕа Аллараа Бэстээх «Сказка» уһуйаан хамаандата ситиһиилээхтик күрэхтэстэ. Уопсай түмүккэ Саха сирин 13 хамаандата бары федеральнай түһүмэх кыайыылаахтарынан буоллулар уонна чөмпүйэнээт анал номинацияларынан бэлиэтэннилэр.
Майатааҕы «Кэнчээри» уһуйааммытын, сэлиэнньэбитин, улууспутун, өрөспүүбүлүкэбитин «За командный дух» анал ааты бэлэмнэнии бөлөх иитиллээччилэрэ Айсен Иванов («Дьэрэкээн оҕолор»), Сайыына Филиппова («Сир симэхтэрэ»), Давид Осипов («Сулусчаан») ыллылар. Салайааччылар: Оксана Оконешникова, Людмила Бурцева.
Маннык суолталаах, билиҥҥи сайдыылаах кэмҥэ наадалаах чөмпүйэнээккэ кыттаннар оҕолорбут кыра саастарыттан инженернэй билимҥэ бастакы хардыылары оҥороллор, бырайыак көмүскээһинэ диэн тугун билэллэр, айар-тутар, интеллектуальнай, түргэнник толкуйдуур, өйгө тутан хаалар дьоҕурдара сайдар, хамаанданан үлэҕэ тулуурдаах, инникигэ дьулуурдаах буоларга, бэйэ икки ардыгар, хамаандаҕа, киэн эйгэҕэ хайдах кэпсэтэн-ипсэтэн, сыһыаннаһан, туттан-хаптан сылдьарга үөрэнэллэр. Настаабынньыктар хас биирдии оҕо дьоҕуругар, сатабылыгар, талааныгар болҕомто ууран, хамаанда чилиэннэрин кэтээн көрөннөр лиидэр хаачыстыбаларын, билэ-көрө сатыыр интэриэстэрин өрө көтөҕөллөр, биирдиилээн оҕону, төрөппүтү кытта үлэлэһэллэр.
10 сыл устата Саха сирин робототехникаҕа хамаандаларын биир ситимнээхтик салайар, бэлэмниир, түмэр «Smart Education» Дьокуускайдааҕы сүрүннүүр хампаанньа, салайааччы ‒ Октябрина Семеновна Петрова. Итини таһынан биһиэхэ куруутун күүс-көмө, өйөбүл-тирэх улуустааҕы үөрэх салалтата, уһуйааммыт салалтата, ытыктабыллаах төрөппүттэрбит буолаллар.
Инникилээх, кэскиллээх роботехника чөмпүйэнээтин сайдар суола кэҥээтин.
Сонуну бэлэмнээтэ: иитээччи Сардана Аввакумова.
