Улуу Кыайыы 80 сылын көрсө Дьокуускайга В.Г.Белинскэй аатынан кыраайы үөрэтэр бибилэтиэкэҕэ сахалартан бастакы Сэбиэскэй Сойуус Дьоруойа Ф.К.Поповка аналлаах киэҥ ис хоһоонноох ахтыы дьоро күнэ буолан ааста.
Дьоро күнү бибилэтиэкэ кылаабынай уонна сүрүннүүр бибилэтиэкэрдэрэ Айталина Прядезникова, Саргылаана Колесова иилээн-саҕалаан ыыттылар. Саалаҕа ыҥырыылаах ыалдьыттар, Ф.К.Попов аймахтара, биир дойдулаахтара, аҕам саастаах дьон уонна Дьокуускай куорат 20-с, 38-с оскуолаларын үөрэнээччилэрэ, учууталлара бааллар. Кылгас киирии тыл, видеокиинэ кэнниттэн Дьоруой Попов хаан-уруу аймаҕа Николай Петрович Попов, слайдалары көрдөрө-көрдөрө, Сүөдэр оҕо сааһын, сэрии иннинээҕи олоҕун, Днепри туорааһыҥҥа оҥорбут холобура суох хорсун быһыытын туһунан сиһилии кэпсээтэ.
Иккис киһинэн саха эстрадатын артыыһа Кеша Лебедев–Амикан тыл эттэ. Кини Дьоруой Поповка эбэтин өттүнэн аймах буолар эбит. Амикан хайдах суос-соҕотоҕун ыраах Белоруссия сиригэр тиийбитин, Дьоруой уҥуоҕар дойдутун буорун уурбутун, белорус омук дьоно саха баатырын хайдах курдук билэллэрин, ытыктыылларын, кини үрдүк аатыгар сүгүрүйэллэрин туһунан истиҥ-иһирэх кэпсээнэ барыбытын долгутта. Бүтээри туран Кеша Лебедев «Герой Попов туһунан ырыаны» толорбутун мустубут дьон ытыс тыаһынан көрүстүбүт.
Биир олус диэн долгутуулаах түгэнинэн анал байыаннай дьайыыга кыттан, Ийэ дойдутун туһугар сырдык тыынын толук уурбут Владислав Тарабукин ийэтин Людмила Петровна Тарабукина уолун туһунан кэпсээнэ буолла. Владислав Баатаратааҕы кадетскай кылааһы бүтэрэн баран, байыаннай буолар баҕата баһыйан, үөрэммит оскуолатыгар эргиллэн саҥа көлүөнэ кадеттары бэлэмнээһиҥҥэ үлэлии сылдьан, дойдутун көмүскүү барбыт уонна кыргыһыы хонуутугар охтубут…
Онтон салгыы мин кылгастык Баатара 8 кылаастаах оскуолатыгар үөрэнэ сылдьан, Дьоруой паартатыгар олорор чиэскэ тиксибиппин, бу мин олохпор умнуллубат түгэн буоларын туһунан бэлиэтээн эттим.
Тэрээһин кэмигэр Дьоруой Федор Попов төрөөбүт дойдутун Баатараны кытта быһа холбонуу ыытылынна. Түмэл дириэктэрэ Альбина Ходулова сибээскэ тахсан, мемориальнай түмэли, Дьоруой пааматынньыгын, өлбүт буойуттарга, тыыл бэтэрээннэригэр аналлаах өйдөбүнньүк билиитэлэри о.д.а. көрдөрдө.
Белинскэй аатынан бибилэтиэкэ үлэһиттэрэ Дьокуускай куорат хас да оскуолатын кытта ыкса сибээстээхтик үлэлииллэр. Бу да сырыыга Дьоруойга аналлаах тэрээһиҥҥэ 20-с уонна 38-с оскуолалартан бэрэстэбиитэллэр бааллар. Үөрэнээччилэр Ф.К.Поповка аналлаах саха бэйиэттэрин хоһоонноруттан аахтылар. Эдэр историк учуутал Алексей Алексеев үөрэтэр оҕолорун кытта Москваҕа тиийэн Кыайыы Храмыгар сылдьыбыттарын, онно биһиги Дьоруойбут Ф.К.Попов хаартыската биир саамай көстүүлээх сиргэ турарын, оҕолор дакылаат аахпыттарын туһунан иһитиннэрдэ.
Ахтыы дьоро күнүн бука бары «Герой Попов туһунан ырыанан» уонна уопсай хаартыскаҕа түһүүнэн түмүктээтибит.
Ыам ыйын 8 күнүгэр В.Г.Белинскэй аатынан кыраайы үөрэтэр бибилэтиэкэ олбуорун иһигэр, Ф.К.Попов уонна Ф.Э.Дзержинскэй уулуссалара быһыта охсуһар сиригэр сахалартан бастакы Сэбиэскэй Сойуус Дьоруойа Федор Кузьмич аатынан искибиэр үөрүүлээх быһыыга-майгыга аһыллыаҕа!
Саха ньургун уола Ф.К.Попов хорсун быһыыта хаһан да умнуллуо суоҕа, үүнэр көлүөнэ ыччакка үтүө холобурунан буолуоҕа!
Елена Прокопьева,
уопсастыбаннай кэрэспэдьиэн, РФ Суруналыыстарын сойууһун чилиэнэ.
