Сайын устата «Олох-дьаһах, хомунаалынай хаһаайыстыбата» ГУТ улуустааҕы салаатын үлэһиттэрэ нэһилиэктэр хочуолунайдарын, ититии ситимнэрин толору өрөмүөннээн быйылгы дьыл оттук кэмэ балаҕан ыйыгар былаан быһыытынан саҕаламмыта.
Маны тэҥэ саҥа эбийиэктэр ититии ситимигэр холбоммуттара. Билиҥҥи туругунан Мэҥэ Хаҥаластааҕы ОДьКХ көрүүтүгэр уопсайа 63 хочуолунай: 38 гааһынан, 25 – чоҕунан оттуллан үлэлии тураллар.
Валерий Ксенофонтов, «Олох-дьаһах, хомунаалынай хаһаайыстыбата» ГУТ Мэҥэ Хаҥаластааҕы салаатын производственнай-тэхиньиичэскэй отделын начаалынньыга:
– Ахсынньы ыйбыт тыйыс тымныылара тиийэн кэллилэр. Үлэбит этэҥҥэ кэминэн баран иһэр. Сылы туоруур чоҕунан хааччыллан олоробут. Кэлэр сылга сөптөөх чох кэлэрэ былааҥҥа киирбитэ. Кэлэн иһэр Саҥа дьылынан биир дойдулаахтарбын уонна кэллиэгэлэрбин итиитик-истиҥник эҕэрдэлиибин. Бары доруобай, чэгиэн, дьоллоох буолуҥ.
Людомир Романов, «Олох-дьаһах, хомунаалынай хаһаайыстыбата» ГУТ Мэҥэ Хаҥаластааҕы салаатын аварийнай-диспетчерскэй сулууспатын начаалынньыга:
– Сайын хочуолунай, ититии ситимин өрөмүөн үлэтэ кыһыҥҥы кэмҥэ саахал ахсаанын олус аччатар. Биһиэхэ аварийнай-диспетчерскэй сулууспаҕа уопсайа 4 диспетчер, 4 сыбаарка үлэһитэ, 4 суоппар, 8 силиэсэр үлэлииллэр. Сууккаҕа 1 диспетчер, 1 сыбаарка үлэһитэ, 1 суоппар, 2 силиэсэр үлэлииллэр. Уолаттар үлэлэрин үчүгэйдик баһылаабыттар, Ыраах-чугас нэһилиэктэргэ саахал таҕыстаҕына дьуһуурустубаҕа үлэлиир уолаттар өрөмүөннээн күүс-көмө буолабыт, алдьаныыны туоратабыт. Ытыктабыллаах Мэҥэ Хаҥалас оройуонун олохтоохторо, дьоно-сэргэтэ, хочуолунайга, ититии ситимигэр алдьаныыны, тэстиини көрдөххүтүнэ диспетчергэ суотабайынан +7 924 760 38 82, стационарнай төлөпүөнүнэн 41 9 47 эрийэн биллэрэргитигэр көрдөһөбүт.
Иван Лукин.
