Олунньу 15 күнүгэр Дьаҥхаады нэһилиэгин дьоно-сэргэтэ эстэпиэтэ былааҕын күөрэччи көтөҕөн Нөөрүктээйи нэһилиэгэр аҕаллылар.
Олохтоохтор оһуокайдара 4,11 баалынан сыаналанна. Быйылгы сылга нөөрүктээйилэр эр дьон оһуокайын бэлэмнээбиттэр. Лауреатынан эдэр кэскиллээх таһаарааччы Ефим Федотов буолары ситистэ. Оҕолорго Артем Федоров, аҕам саастаахтарга Валерий Старостин дипломант буоллулар. Бу эмиэ саҥа саҕалыыр дьон инникитин, оһуохай түһүлгэлэригэр кыттан, сайдар-үүнэр кэскиллээхтэр диэн бэлиэтээтибит.
Дьаҥхаадылар уус-уран самодеятельностарын кэнсиэрэ 4,11 баалынан сыаналанна.
Лауреаттарынан “Дэйбиирдээх үҥкүү”, “Кыталык үҥкүүтэ”, “Калмыкскай үҥкүү” — “Дылбаахы ыччата” үҥкүү бөлөҕүн толоруулара, Дьулус Могдоев сольнай толоруутугар “Монгольскай үҥкүү” ‒ салайааччылара Татьяна Говорова, В.Андросов мелодиятыгар “Маҥнайгы хаар” Айсен Местников уонна Илья Павлов, Николай Уваров тылыгар уонна мелодиятыгар “Бэйэҕэ эрэл” сольнай ырыаларынан, “Тэтим” фольклорнай бөлөх чабырҕахсыттара (сал.Айталина Верховцева) буоллулар.
Дипломунан Төхтүрдээҕи хуор – Иван Брызгалов тылларыгар, Владимир Кузьмин мелодиятыгар “Сахам сирэ”, С.Данилов тылларыгар, Роман Плотников мелодиятыгар “Кыталыгы харыстаан” квартет, Г.Кобяков тылларыгар, А.Калининскай мелодиятыгар “Кэрэҕэ аналбыт” ‒ “Сайа” дьахталлар ансаамбылларын толоруулара, вокальнай коллективтар салайааччылара Надежда Петрова, фольклорнай коллаборация “Туундара айана” (Анна Максимова), “Мэнигийээн” көр-күлү бөлөҕө ‒ сценка “Кусчуттар” (сал. Айталина Верховцева) “Дылбаахы ыччата” үҥкүү бөлөҕө (Татьяна Говорова) бэлиэтэннилэр.
Төхтүрдэр урукку да сылларга инники күөҥҥэ сылдьар биир кэскиллээх, элбэҕи эрэннэрэр кыахтаах нэһилиэгинэн биллэр. Ол курдук кулууп үлэтигэр сүрүн күүһүнэн Төхтүрдээҕи оҕо ускуустубатын оскуолата буолар. Бу да сырыыга ырыалары, үҥкүүлэри, фольклору муусукаалынай оскуола преподавателлэрэ кыайа-хото бэлэмнээбиттэр. Саҥа эдэр талааннаах ыччат дьон эбиллибиттэрин бэлиэтии көрдүбүт. Оскуола иитиллээччилэрэ, номнуо улаатан, нэһилиэк чиэһин көмүскүүр ыччат дьон үүнэн тахсыбыттарын астынан бэлиэтиибит.
Спортивнай күрэхтэһиилэр 24/11 ахсаанынан кыайыы павловскайдар туһаларыгар буолла.
