Кулун тутар 31 күнүгэр Майа сэлиэнньэтин Пивоваровтар дьиэ кэргэн алаастарыгар Арҕаа Сэппэн эбэтигэр өрөспүүбүлүкэҕэ Оҕо саас, улууска Тыа хаһаайыстыбатын, нэһилиэккэ Олоҥхо сылларын чэрчитинэн, Сталин аатынан колхуос төрүттэммитэ 95 сылыгар аналлаах Хара нэһилиэгин дьаһалтата уонна Петр Пестряков дьиэ кэргэнэ туруорбут бириистэригэр «Куйуур 2024» аһаҕас күрэх үрдүк таһымҥа буолан ааста.
Прокопий Константинович Андреев үөрэнээччитэ Петр Пестряков куйуур күрэҕин бэйэтэ баҕа өттүнэн сүүрэн-көтөн, успуонсардары булан, 6-с төгүлүн оҥордо. Бу күрэхтэһиилэрбитин сылын аайы нэһилиэк дьаһалтата, тыа сирин түөлбэтин баһылыга Дария Ивановна Назарова күүстээхтик өйүүллэр.
Быйыл күрэхпитигэр 12 хамаанда, 58 спортсмен кытыннылар. Мэҥэ Хаҥалас нэһилиэктэрин күүстээх анньыыһыттара, Чурапчы улууһун Арыылаах ойбон алларааччылара, Нам улууһун Арбын нэһилиэгин кэскиллээх анньыыһыттара күөн көрүстүлэр. «Куйуур 2024» былааҕын былырыыҥҥы күрэх муҥутуур кыайыылааҕа Николай Дьячковский таһаарда. Түсчүт Зиновий Игнатьев аал уоту оттон, арыылаах алаадьынан күндүлээтэ. Күммүт да туран, сааскы сылаастыы тыыннанна.
Бастакы түһүмэххэ эбэҕэ киирэн 2 чаас устата куйуурдааһыҥҥа, иккис түһүмэх – чэй өрүүтүгэр, үһүс түһүмэх – ойбон алларыытыгар эстэпиэтэҕэ тыҥааһыннаах киирсиилэр буоллулар.
Түмүккэ хамаанданан кыайыы өрөгөйүн биллилэр: 1-кы миэстэ Майа хамаандата, 2-с миэстэ – Лоомтука, 3-с миэстэ – Хаптаҕай.
Кыайбыт хамаанда 50000 солкуобайдаах, иккис – 30000, үһүс 20000 солкуобай суумалаах уу харчынан Пестряковтар, Егоровтар туруорбут бириистэрин хаһаайыннара буоллулар.
Саастарынан биирдиилээн күрэскэ: 17 сааһыгар дылы (1 ойбон) 1-кы миэстэ Артем Николаев (Нам, Арбын), 2-с миэстэ Витя Могдоев (Мэҥэ Хаҥалас, Төхтүр), 3-с миэстэ Рома Макаров (Мэҥэ Хаҥалас, Тиэлиги).
18-39 саастаахтарга (3 ойбон) 1-кы миэстэ Николай Дьячковский (Ломтука), 2-с миэстэ Владимир Васильев (Төхтүр), 3-с миэстэ Андрей Петров (Өлөчөй).
40-49 саастаахтарга (2 ойбон) 1-кы миэстэ Вячеслав Окоров (Мэлдьэхси), 2-с миэстэ Владимир Иванов (Хаптаҕай), 3-с миэстэ Марк Демьянов (Чурапчы, Арыылаах).
50-59 саастаахтарга (1 ойбон) 1 миэстэ Геннадий Атласов (Төҥүлү), 2-с миэстэ Дмитрий Зыков (Табаҕа), 3 миэстэ Федор Оконешников (Павловскай).
60-тан үөһээ саастаахтарга (1 ойбон) 1-кы миэстэ Дмитрий Федоров (Моорук), 2-с миэстэ Василий Борисов (Төхтүр), 3-с миэстэ Валентин Борисов (Ломтука).
Дьэ онтон саамай сүрүн ‒ муҥутуур кыайыылаах аатын иһин киирсии буолла. Манна кылаан бириис – Петр Пестряков дьиэ кэргэнэ туруорбут убаһата. Уолаттар үс ойбоҥҥо кииристилэр. Тыҥааһыннаах киирсиигэ Лоомтука анньыыһыта тэҥнээҕин булбата – Николай Дьячковскай «Куйуур 2024» сүрүн бирииһин – убаһа хаһаайына буолла. Санатар буоллахха, былырыыҥҥы күрэхтэһиигэ Коля убаһа хаһаайына буолбута, бу да сырыыга онтун мүччү туппата.
Алексей Гаврильевич Пивоваров бу быйылгы күрэхтэһиибитин көҕүлээтэ уонна күүстээх өйөбүл буолла. Ол курдук, алаастарыгар күрэхтэһиини тэрийдилэр уонна биир кылаан бирииһи туруордулар: 60-тан үөһээ саастаах кыайбыт анньыыһыкка ньирэй уонна иккис миэстэҕэ мэҥиэ кус туруордулар. Онуоха (60-тан үөһээ, 1 ойбон): 1-кы миэстэ Василий Борисов (Төхтүр) ньирэй хаһаайына буолла. 2-с миэстэҕэ Дмитрий Федоров (Моорук) тахсан мэҥиэ кус хаһаайына буолла.
Буоларын курдук, анал ааттары иҥэрдилэр: «Бөдөҥ собо» ‒ Андрей Пивоваров (Майа), «Бастакы балык» ‒ Иван Марков (Табаҕа), Вячеслав Окороков (Мэлдьэхси), «Эдэр кыттааччы» ‒ Төхтүртэн 16 саастаах Максим Митрофанов, «Аҕам саастаах кыттааччы» ‒ Төхтүртэн 75 саастаах Иван Шарин буоллулар, сэмэй бэлэх тутан үөрдүлэр.
Хара нэһилиэгин олохтоохторо биирдиилээн күрэххэ бириис туруордулар: А.С.Антонов аймахтара, И.Я.Григорьев оҕолоро, сиэннэрэ, Терентьевтар аҕа уустара, П.Н.Дмитриев ‒ Бачыым Байбал оҕолоро, Е.И.Лукин оҕолоро, сиэннэрэ.
Үгэс быһыытынан итии чэй, кофе, итии миин босхо күндүлээн, дьон-сэргэ астына-дуоһуйа аһаан, амсайан барда.
Барҕа баһыыба, махтал тылларын биһигини өйөөбүт, успуонсардаабыт, сэмэй кылааттарын киллэрсибит дьоммутугар аныыбыт! Сылын аайы бииргэ төрөөбүттэрим, ийэм, аҕам күүстээх өйөбүл буолаллар, тэрийсиигэ барытыгар сылдьаллар. Людмила, Михаил Егоровтар, ону тэҥэ абаҕам дьоно Кыһылык Бүөтүр оҕолоро, эдьиийим Ульяна Петровна дьаһалынан сылын ахсын ыйыталаһан, баалларын биллэрэн, кыра да буоллун, улахан да буоллун, өрүү илиилэрин ууна сылдьалларыттан үөрэбин, кынаттанабын! Этэргэ дылы, кэннигэр «тыылыҥ» күүстээх буоллаҕына, хаһан даҕаны өлөн-охтон биэрбэккин. Махтал тылларын тиэрдэбит табаарыстарбытыгар, уолбутун өйөөбүт доҕотторугар!
Барыгытыгар этэҥҥэ буолууну баҕарабын!
Сардаана, Павел Пестряковтар.
Хара.