«Кэрэни-үтүөнү үксэтэр ”Сардаана” кэскилэ» аахсыйа-кэнсиэр буолла

Муус устар 24 күнүгэр Майа сэлиэнньэтигэр Мэҥэ Хаҥалас улууһугар оскуола иннинээҕи үөрэхтээһин 100 сыллаах үбүлүөйүгэр аналлаах «Кэрэни-үтүөнү үксэтэр “Сардаана” кэскилэ» аахсыйа-кэнсиэр буолла.

Аахсыйаны Майатааҕы «Сардаана» оҕону сайыннарар киин иитиллээччилэрэ, оҕолор төрөппүттэрэ, киин выпускниктара, үлэһиттэрэ, бэтэрээннэрэ тэрийдилэр.

Бэлиэ тэрээһини ыалдьыттарыгар «Сардаана» киин талба талааннаахтарын оҥоһуктарын быыстапкатын, бэйэ оҥорбут бородууксуйатынан уонна арассааданан атыы-эргиэн дьаарбаҥка, айар дьоҕурдарынан кэнсиэр туруордулар.

Татьяна Егорова, Майатааҕы «Сардаана» оҕону сайыннарар киин дириэктэрин эбээһинэһин толорооччу:

– Үбүлүөйдээх сылынан ыытыллар бырааһынньыкка улуустааҕы үөрэх управлениетын «100 үтүө дьыала» челлендж чэрчитинэн истиҥ эйэҕэс, ырыа-үҥкүү «Кэрэни-үтүөнү үксэтэр “Сардаана” кэскилэ» аахсыйа-кэнсиэрбитин бэлэхтээри үөрэн, долгуйан турабыт. Маны тэҥэ биһиги ыҥырыыбытынан ХИФУ маркетиҥҥа уонна коммуникацияҕа отделын начаалынньыга Анатолий Васильев, отдел сүрүннүүр исписэлииһэ Валерия Кардашевская улууспут оскуола иннинээҕи педагогдатыгар аныгы үйэҕэ сибилигин уһулуччу суолталаах тиэмэлэргэ «Оҥоһуу өй», «SMM (бородууксуйаны уонна өҥөнү көҕүлээһиҥҥэ социальнай ситимнэри туһаныы)» диэн куурус ыыттылар.

Дьоро киэһэҕэ СӨ үтүөлээх тутааччыта, Тараҕай нэһилиэгин Бочуоттах гражданина Михаил Эверстов тылларыгар, СӨ култууратын үтүөлээх үлэһитэ, СӨ гармонистарын, аккардионистарын, баянистарын сойууһун чилиэнэ, мелодист Вламимир Кузьмин дьүрүлүгэр «Тупса тур, уһуйааммыт!» «Сардаана» оҕону сайыннарар киин өрөгөй ырыата сүрэхтэннэ.

Кэнсиэргэ киирбит харчыны анал байыаннай дьайыыга сылдьар аҕалардаах иитиллээччилэрбит дьиэ кэргэннэригэр анаатыбыт. Оҕолорбут үүннэрбит сибэккилэрин Майа дьаһалтатытагар сэлиэнньэни көҕөрдүүгэ бэлэхтээтибит. Улууспут Дьиэ кэргэҥҥэ элбэх өрүттээх өҥөнү оҥорор киин сокуоннай саастарын ситэ илик оҕолору социальнай реабилитациялыыр салаатыгар иитээччилэрбит оҥорбут оҕону сайыннарар оонньуурдарын бэлэх ууннубут.

Баҕарабыт биһи кырачаан оҕолорбутугар чэгиэн-чэбдик доруобуйаны, дьоһун дьон буола улааттыннар.

Бииргэ үлэлиир кэлэктииппин, оскуола иннинииҕи үөрэхтээһин бары үлэһиттэрин, ытык бэтэрээннэрбитин итиитик-истиҥник эҕэрдэлиибин, күүс-көмө буолар төрөппүттэрбитигэр махталбын тиэрдэбин, – диэн иһитиннэрдэ.

 

Иван Лукин.