Алтынньы 28 күнүгэр Харатааҕы «Кэрэчээн» уһуйаан улахан бөлөҕүн иитиллээччилэригэр олус ураты уонна умнуллубат тэрээһин – «Өксөкү сиэннэрэ» хамсааһыҥҥа сүрэхтэниилэрэ буолла.
Бу күн кырачааннар, Өксөкү оҕолорун кэриэтэ, төрөөбүт дойдуларыгар, саха тылыгар, култууратыгар бэриниилээх буоларга бэлэмнэрин биллэрдилэр. Тэрээһини уһуйаан выпускниктара Мичийэ Петрова, Дуолан Лукин, Тая Слободчикова дойду, Саха сирин, Мэҥэ Хаҥалас улууһун былаахтарын киллэрэн арыйдылар. И.Г.Игнатьев аатынан оскуола дириэктэрин сүбэһитэ Лилия Антоновна Киренская эҕэрдэ тылын эттэ, өйдөбүнньүк бэлэҕин туттарда. Бэлэмнэнии бөлөх оҕолоро бэйэлэрин дьоҕурдарын көрдөрдүлэр, биэс араас трегынан хоһооннору аахтылар, ырыалары ыллаатылар, үҥкүүлээтилэр. Доҕордуу буолууга оонньуу оонньоотулар, улахан бөлөх иитиллээччилэрэ кэс тылларын эттилэр.
«Өксөкү сиэннэрэ» хамсааһын – оҕолорго төрүт үгэстэргэ, айылҕаҕа тапталы иҥэрэр, бэйэни сайыннарар, сахалыы өйү-санааны кэҥэтэр улахан суолталаах. Маннык тэрээһиннэр оҕолорго кыра эрдэхтэриттэн ийэ дойдуларыгар, төрөөбүт норуоттарыгар тапталы, киэн туттууну иҥэрэллэр.
Мария Тастыгина,
сүрүннүүр иитээччи.
