Майа сэлиэнньэтигэр «Кыталык» уопсастыбаннай кииҥҥэ «Үрүҥ торуоска» диэн Бүтүн Арассыыйатааҕы аахсыйа чэрчитинэн улуустааҕы көрбөттөр уопсастыбаларын күрэхтэһиитэ буолла.
Тэрээһин кыттыылаахтара Брайль тиһигинэн туттуллар толкуйдуур дьоҕуру сайыннарар “Катамино”, “Калах”, “Квиксо” остуол оонньууларыгар күрэхтэстилэр. Уопсай түмүккэ бастакы миэстэни Василий Алексеев, иккиһи – Виктория Христофорова, үсүһү – Александра Назарова ыллылар.
«Бу маннык анал остуол оонньуулара Саха сиринээҕи көрбөттөр уопсастыбаларыгар тэнийдэ. Маннык көрүҥнэргэ өрөспүүбүлүкэҕэ, салгыы Арассыыйа таһымыгар күрэхтэһиилэр ыытыллаллар. Былырыын биһиги улууспут олохтооҕо, уопсастыба чилиэнэ Василий Алексеев өрөспүүбүлүкэ хамаандатыгар киирэн Нижнэй Новгородка кыттан кэлбитэ. Быйыл Вологда куоракка буолар күрэхтэһиигэ баран киирсээри бэлэмнэнэ, дьарыктана сылдьабыт», – диэн улуустааҕы көрбөттөр уопсастыбаларын бэрэссэдээтэлэ Иван Семенов иһитиннэрдэ.
