Сэтинньи 7 күнүгэр Майаҕа Д.Ф. Ходулов аатынан култуура киинигэр Аркадий Новиков төрүттээбит “Көөчөөн көрө” мини тыйаатыр “Мэҥэ көрдөөхтөрө” бырайыага 37-с сезонун Айаан Стручков уонна Афанасий Андреев арыйдылар. Мэҥэ Хаҥаласка “Оһуобай бөһүөлэк” диэн саҥа дэриэбинэ баар буолбут. Манна уһуйаан, балыыһа, маҕаһыын – бары бааллар. Бу, дьэ, көр олохтоохтордоох бөһүөлэк буолла.
Улууспут нэһилиэктэрин көрдөөх дьоно кыттыылаах “Көрсүбүччэ күлсүөххэ” киэҥ бырагыраамалаах кэнсиэри дьон-сэргэ дуоһуйа көрдө, күлэн-үөрэн көнньүөрдэ.
Манна Чыамайыкыттан Александра Васильева салайааччылаах “Мээнэ дьон”, Өлөчөйтөн “Дьэргэй” бөлөх, Төхтүртэн “Дьаҥхаады мэнигийээннэрэ”, Дойду нэһилиэгиттэн “Аахсиэ”, Маттаттан Мария Кычкина салайааччылаах “Дэгэт” бөлөх, Лоомтукаттан “Түмсүү” мини көр-күлүү тыйаатыра, Майатааҕы киин балыыһа көрү көҕүлүттэн туппут дьоно көрөөччүлэр үйэлэрин уһаттылар буолуохтаах.
Чыамайыкылар “Миниатюралара”, Төхтүртэн “Дьукаахтар”, Матталар “Эмээхситтэрэ”, Антонина Гаврильева “Күнүүһүт” монолога, Лоомтукалар “Оо, дьэ, дьүөгэлэр”, Майатааҕы киин балыыһа “Оҕо саада”, Анна Охлопкова, Афанасий Андреев, Мария Терентьева “Тылбаасчыт” сценкалара, Айаан Стручков “Хоргуйуу”, “Стоматология” нүөмэрдэрэ, Афанасий Андреев индийскэй таптала, кистэлэҥ талаана, Өлөчөйдөр устудьуону атаарыылара, Аркадий Новиков репертуарыттан “Сталин”, о.д.а. нүөмэрдэр көрөөччү кутун тутуохтарын туттулар.
СӨ култууратын үтүөлээх үлэһитэ, “Көөчөөн көрө” мини тыйаатыр салайааччыта Анна Охлопкова бу киэһээҥҥи кэнсиэргэ кэлбит көрөөччүлэригэр махтанна. Кини: “Бу уустук кэмҥэ көргө-күлүүгэ дьон наһаа наадыйар. Биһиги дьоҥҥо үөрүүнү бэлэхтиир дьоллоох дьоммут. Маннык үлэлээхпитинэн киэн туттабыт”, – диэн туран бу былдьаһыктаах күннэргэ быыс булан кэлбит биир идэлээхтэригэр махтанан хас биирдиилэригэр сэмэй бэлэхтэрин туттарда.
Дьэ, кырдьык, дьоллоох дьон дьону үөрдэллэр.
Марелла Баишева.
