Саха сирин күөллэрэ көмүс хатырыктааҕынан баайдар. Сут-кураан сылларга собо балык норуоту үрүҥ тыынын өллөйдөөбүтэ.
Араастаан астаммыт собо балык саха ыалын остуолун маанылаах аһа. А, С, D, Е, РР итиэннэ В бөлөх битэмииннэринэн, кальцийынан, никелинэн, магнийынан, фосфорынан, тимиринэн, о.д.а. доруобуйаҕа наадалаах химическэй элэмиэннэринэн баай, үгүс ыарыыттан харыстыыр кыахтаах.
Майа сэлиэнньэтин олохтооҕо, үлэ бэтэрээнэ, рационализатор Константин Лонгинов тыа сирин олохтоохторугар туһалаах тыа хаһаайыстыбатын тэриллэригэр саҥаттан саҥаны айан, үлэлэрин чэпчэтэр. Кини бу күннэргэ илим үтүллэр кэмэ чугаһаабытынан, дьаакырын уларыппыт илимин аҕалан көрдөрөн туран, быһааран биэрдэ. Саҥа илими аллараа хотоҕоһун сибиниэһин сыыҥкабай боробулуохаҕа уларытан иилистибэт ньыматын толкуйдаан боруобалаабыт. Маны туттан көрбүт дьон кэрэхсээбит, илим иилистибэт буолбутун биһирээбиттэр.
Константин Иннокентьевич: “Илиммитин ылабыт уонна үөһэ хотоҕоһун тыыппаппыт, бэйэтинэн барар, онтон аллараа хотоҕоһо сибиниэстээх, ол иилистимтиэ диэн, дьаакырын сибиниэһин хотуобайын чыскынан тууран ылан быраҕабын уонна 20-лии см уһуннаах сыыҥкабай боробулуоханы хам туттаран биэрэбин, оччоҕо илим иилистибэт буолар. Дьаакыр уһуна 10 см. Маннык 60-ча устуука оҥоһулуннаҕына сөп буолар. Иилиллибитин кэннэ дьаакырдар икки ардылара ис өттүттэн 20 см, тас өттүттэн 35 см уһуннаах буолар.
Аны туран, кэнники илим алдьаннаҕына, ситимин аллараа өттүн ылан саҥа илимҥэ холбуубун. Сыыҥкабай дьаакыр дьэбиннирбэт, онон үйэлээх буолар, бу хастаах баҕарар илимҥэ барсар”, — диир саҥаны айааччы.
Константин Лонгиновка сайынын илим үтэр дьоҥҥо бэртээхэй сүбэтигэр махтанабыт.
Марелла Баишева.
