Дойду көмүскэлигэр анал байыаннай дьайыыга сылдьар байыастарга махталларын бэлиэтинэн, тохсунньу 27 күнүгэр Майа сэлиэнньэтигэр «Биир сомоҕо» түмсүү салайааччыта Антонина Потаповна Матчитова уонна «Мега» волонтер-эмчиттэр түмсүүлэрин салайааччы Вероника Николаевна Семенова-Хомусчаана көҕүлээһиннэринэн, улууспут баһылыга Дмитрий Тихонов өйөбүлүнэн анал байыаннай дьайыы кыттыылаахтарыгар уонна кинилэр дьиэ кэргэннэригэр аналлаах уопсай туругу тупсарыныы, илбийии хоһо арылынна.
Анал хос уруккута нэһилиэнньэ көмүскэллээх буолуу улуустааҕы киинэ үлэлээбит сиригэр, Сэбиэскэй уулусса 27/1 дьиэтигэр баар. Манна өрөбүл күннэртэн ураты күннэргэ анал байыаннай дьайыы кыттыылаахтарыгар, кинилэр дьиэ кэргэннэригэр босхо массаас, ол эбэтэр, илбийии өҥөтө оҥоһуллуо.
Арассыыйа эмчиттэрин Конфедерациятын Саха сиринээҕи салаатын салайааччыта, алгысчыт, норуот эмчитэ, норуодунай мэдиссиинэ туйгуна, этнопсихолог, уйулҕаһыт Вероника Семенова-Хомусчаана уонна Антонина Потаповна Матчитова анал байыаннай дьайыыга сырдык тыыннарын толук уурбут байыастар дьиэ кэргэннэрин өрөспүүбүлүкэтээҕи сойуустарын чилиэннэрэ.
Вероника Николаевна:
- Бүгүн манна 14-с хоспутун арыйаары турабыт. Барыта 28 улууһу кэрийдибит. Манна барытыгар анал байыаннай дьайыы кыттыылаахтарыгар, кинилэр дьиэ кэргэннэригэр, холбоон үс тыһыынчаттан тахса киһиэхэ 10000 кэриҥэ босхо илбийии өҥөтүн оҥордубут. Манна биһиги улуустар баһылыктарын, дьокутааттар өйөбүллэринэн босхо үлэлиир илбийии хосторун арыйабыт. Хостор үгүстэрэ мин уолум позывной аатынан “Мега” диэн ааттаахтар. Өлөөҥҥө үс хос үлэлиир. Онно 114-с биригээдэҕэ “Мега” диэн позывнойдаах мин уолбун кытта “Амакаа” диэн позывнойдаах уол бииргэ сулууспалаабыта, онон биир хос кини аатынан ааттаммыта. Бэйэм сураҕа суох сүппүттэргэ үлэлэһэбин. Манна барарга-кэлэргэ 4-5 дьааһык гуманитарнай көмө илдьэбин. Онно дронтан көмүскүүр суорҕан, таҥас-сап, эмп-том, о.д.а. киирэллэр. Бу күннэргэ биир уолбутугар эвакуационнай тэлиэскэ ыыттыбыт. Дьокуускайга Крестьянскай ырыынакка өйү-санааны сааһылааһыҥҥа, эти-сиини чэбдигирдэргэ үлэлиир хостоохпут — диэн уопсастыбаннай үлэтин кылгастык билиһиннэрдэ.
Анал хос үөрүүлээх тэрээһинин норуот эмчитэ сахалыы сиэринэн аал уотун оттон, Үрдүкү Айыыларга сүгүрүйэн, алгыстаах алаадьынан айах тутан, алгыһынан арыйда.
Саха сиринээҕи эмчиттэр түмсүүлэрин салайааччыта В.Н. Семенова-Хомусчаана эмчит-волонтер Светлана Дмитриевна Ивановаҕа Саха Өрөспүүбүлүкэтин Бырабыыталыстыбатын Махтал суругун үөрүүлээх быһыыга-майгыга туттарда. Манна даҕатан эттэххэ, Улуу Кыайыы 80 сылыгар анаан Светлана Дмитриевна 80 анал байыаннай дьайыы кыттыылаахтарыгар, кинилэр дьиэ кэргэннэригэр босхо илбийии өҥөтүн оҥорон бэйэтин кылаатын киллэрбитэ. Кини үлэтэ үтүө түмүктэрдээҕин куйаар ситиминэн элбэх киһи махтана бэлиэтиир. Уопуттаах, анал үөрэхтээх илбииһит, норуот эмчитэ Светлана Иванова үлэтин бу күнтэн саҕалаата.
«Биир сомоҕо» түмсүү салайааччыта Антонина Потаповна Матчитова, чилиэннэрэ Софья Еферьевна Иванова, Валентина Сергеевна Илларионова анал байыаннай дьайыы дьиэ кэргэннэригэр аналлаах араас тэрээһиннэри, маастар-кылаастары ыытар былааннаахтарын сырдаттылар.
Майатааҕы «Түмэн» уопсастыбаннай холбоһук салайааччыта Мария Лукина “Бары биир түмсүү дьонун курдук биир санаанан, бэйэ-бэйэни өйөһөн, үлэни былааннаан ыытыахпыт” диэн санаатын үллэһиннэ .
Дьоммутун-сэргэбитин өйүүр сыаллаах маннык туругу чэбдигирдэр хос арыллан үлэлиирэ барыбыт сүргэбитин көтөҕөр. Кыайыы туһугар, дьон уйулҕата, туруга бөҕөргүүрүн туһугар анаммыт үлэ тахсыылаах буоллун диэммит алгыспыт маанытын аныыбыт.
Улууспут олохтоохторо, анал байыаннай дьайыы кыттыылаахтара, кинилэр дьиэ кэргэннэрэ кэлэннэр туруктарын тупсарынар босхо өҥөнөн туһанан абыраныахтара, бириэмэлэрин көдьүүстээхтик атаарыахтара диэн эрэнэбит.
Эйэлээх олох туһугар түүннэри-күнүстэри туруулаһар биир дойдулаахтарбыт өрөгөй кыайыы кынаттаах эргиллэн кэлэллэригэр бу төһүү күүс буолуоҕа.
Марелла Баишева.
