Бүгүн, от ыйын 15 күнүгэр, үлэ, тыыл, Саха Өрөспүүбүлүкэтин тыатын хаһаайыстыбатын бочуоттаах бэтэрээнэ, «Бочуот Знага» уордьан кавалера, өр сыл Тараҕай нэһилиэгэр холкуоска, совхозка үтүө суобастаахтык үлэлээбит Мэҥэ Хаҥалас улууһун Бочуоттаах гражданина Февронья Алексеевна Степанова төрөөбүтэ 100 сылын туолла.
Бу дьоһун күҥҥэ сөп түбэһиннэрэн бүгүн Табаҕаҕа бэлиэ түгэн буолла.
Тараҕайдар биир дойдулаахтара Галина Николаевна Дьяконова кэргэнинээн Тимофей Николаевичтыын инники көлүөнэ кэнэҕэски ыччат дьоҥҥо холобур буолар олоҕу олорон ааспыт төрөппүттэрин – «Бочуот Знага» уордьан кавалера Февронья Алексеевна Степанова уонна Улуу Кыайыыны уһансыбыт «Аҕа дойду Улуу сэриитигэр Германияны кыайыы иһин» мэтээллээх тыа хаһаайыстыбатын туруу үлэһитэ Николай Алексеевич Слепцов ааттарынан икки дьэрэкээн ыскамыайкалары нэһилиэк олохтоохторо сынньанар сирдэригэр туруордулар.
Төрөөбүт нэһилиэкпит үүнэ-сайда турдун диэн санааттан оҥоһуллубут үтүө бэлэҕи тутан биир дойдулаахтара Галина Николаевнаҕа, Тимофей Николаевичка дириҥ махталларын тиэрдэллэр.
