Кистэл буолбатах, билиҥҥи түргэн, тэтимнээх, интернет үйэтигэр төрөппүт оҕотун кытары кэпсэтэрэ, алтыһара, бириэмэни бииргэ атаарара олус аҕыйаата.
Ф.Г.Охлопков аатынан Майа орто оскуолатыгар муус устар 16 күнүгэр «Дьиэ-кэргэн, оскуола – биир ситим» төрөппүт түһүлгэтин иитинэн «Ийэ суруга» психологическай практикум ыытылынна. Статистика көрдөрөрүнэн, СПТ тестирование түмүгүнэн, чуолаан улахан кылаас оҕолоро чугас дьонуттан, төрөппүттэриттэн элбэҕи кистииллэрэ, сатаан истиҥник кэпсэппэттэрэ, сүбэ-ама ылартан туттуналлара уонна үксүн доҕотторун кытары куйаар ситимин нөҥүө кэпсэтиилэри ордороллоро биллэр.
«Ийэ суруга» практикум ийэ уонна оҕо икки ардыгар истиҥ, сылаас сыһыаны күүһүрдэргэ сатаан этиллибэтэх тыллары сурук нөҥүө тириэрдэргэ, умнуллубут кыра эрдэҕинээҕи түгэннэри тилиннэрэргэ анаммыт дириҥ ис хоһоонноох тренинг-практикум буолар. Оскуола педагог-психолога биир чаас устата бу дьарыгы иилээн-саҕалаан ыытта. Дьарык бастакы чааһыгар төрөппүттэри кытта билсиһии, бэйэ санаатын этиниигэ тренинг буолла, иккис чааһыгар төрөппүттэргэ оҕолоругар анаан сурук суруйтарда. Истиҥ муусука абылаҥар ийэлэр, ону тэҥэ 9″а» кылаас үөрэнээччитэ Коля Брызгалов аҕата Николай Гаврильевич турукка киирэн ис сүрэхтэн тахсар суруктарын суруйдулар.
Түмүккэ педагог-психолог бэйэтин оҕотугар суруйбут суругун аахта, төрөппүттэргэ оҕолоро суруйбут суруктарын бэлэх уунна. Хас биирдии төрөппүт олус диэн долгуйда, үөрдэ уонна уйадыйда. «Бүгүҥҥү күҥҥэ оҕобунуун өссө чугас буоллубут» диэн бэлиэтээтилэр, махтаннылар, өссө да бу курдук дьарыктар буола туралларыгар баҕардылар.
Туйаара Пинигина,
Майатааҕы Ф.Г. Охлопков аатынан орто оскуола педагог-психолога.
