Күн киһитэ көмүскэс, Айыы киһитэ аһыныгас
Бэс ыйын 5 күнүгэр Майа сэлиэнньэтигэр Степанов аатынан уулусса 14/1 №-дээх дьиэтигэр икки этээстээх мас уопсай дьиэ умайан 17 ыал аһаҕас халлаан анныгар хааллылар.
Улуус уонна олохтоох дьаһалта тута түргэнник быһаарыныы ылынаннар ол киэһэ Д.Ф.Ходулов аатынан култуура киинигэр быстах кэмҥэ олорор пууну тэрийбиттэрэ. Олохтоохтор күүстэринэн хомуллар орон, утуйар таҥас, ас-үөл аҕалыллан, уйулҕа үөрэхтээхтэрэ кыттыылаах бастакы көмөлөр оҥоһуллубуттара.
Д.Ф.Ходулов аатынан култуура киинигэр Мария Лукина салайааччылаах, Федора Наумова солбуйааччылаах “Түмэн” уопсастыбаннай холбоһук түмсүүлэрин волонтердара олохтоох дьаһалта үлэһиттэрин кытта күннэтэ сарсыарда 9 чаастан киэһэ 20 чааска диэри нэһилиэнньэттэн көмөнү туттулар.
Баһаартан эмсэҕэлээбит дьоҥҥо олохтоох дьаһалта үлэһиттэрэ, сэлиэнньэ олохтоохторо, Аллараа Бэстээх, Майа урбаанньыттара, түмсүүлэрэ күүс-көмө, өйөбүл буоланнар, аһылыгынан, күннэтэ туттуллар малынан, утуйар, таҥнар таҥаһынан, үбүнэн-харчынан, аһыыр иһитинэн хааччыйдылар. Биирдиилээн дьиэ кэргэттэргэ аадырыстаах көмөлөр тиэрдилиннилэр.
Түмэннэр хас биирдии ыалы көмө пуунугар ыҥыран, наадыйалларын булан ылалларыгар ыйан-кэрдэн көмөлөстүлэр. Баһаартан эмсэҕэлээбиттэр улуус уонна олохтоох дьаһалта, биир дойдулаахтарбыт сүҥкэн көмөнү оҥордулар диэн махтаналлар. Элбэх оҕолоох Наталья, Иван Егоровтар дьиэ кэргэн аҕалара: “Олохтоох дьаһалта үлэһиттэрэ оннооҕор күл анныттан докумуоммутун булан тиксэрдилэр”, ‒ диэн махтанна.
Баһаарга эмсэҕэлээбит дьиэ кэргэттэргэ 1967 с. Майа орто оскуолатын бүтэрбиттэр 22500 солк., “Түһүлгэ”, “Айыллыат” фольклор түмсүүлэрэ 4500 солк., “Көмүс кэм” 6000 солк., култуура бэтэрээннэрэ 9000 солк., Үһүс оскуола «Иэйии» куруһуогун дьоно 5500 солк. харчынан көмөлөрү оҥордулар.
Мария Сергеева көҕүлээһининэн “Сэрии сылларын оҕолоро” түмсүү 41000 солк. хомуйаннар үтүө холобуру көрдөрдүлэр.
“Мичил” оҕону сайыннарар киин 20000, кыраайы үөрэтэр мусуой 7100, Ф.Г.Охлопков аатынан орто оскуола 64500, Николай Старостин 15000, Василий Окороков, Венера Колесова, Анна Алексеева, Ульяна Горохова, Анатолий Ким 5000-лыы, Нелли Васильева, Анатолий Чичахов, Варвара Трифонова, Ким Скрябин, Елена Абрамова 3000-лыы солк. харчынан көмөлөстүлэр.
Аллараа Бэстээхтэн олохтоох дьаһалта уонна “Энергосбыт” тэрилтэ, Майатааҕы почта, “Кэнчээри” оҕону сайыннарар киин, “Мэҥэ-шопинг”, “Талер”, “Мозаика”, “Татьяна”, “Байылыат” маҕаһыыннар кэлэктииптэрэ, Ходоро бэтэрээннэрэ таҥаһынан-сабынан, иһитинэн-хомуоһунан, аһынан-үөлүнэн, Ороссолуода дьаһалтата 30 куул хортуоппуйунан көмөлөрү оҥордулар.
Бу күҥҥэ диэри 134 көмө оҥоһулунна. Ону таһынан 14 ыалга аадырыстаах көмө оҥоһуллан тиксэрилиннэ. Балыыһаҕа киирбиттэргэ олохтоох дьаһалта, “түмэннэр” морс, аһылык ыытан көмөлөһөллөр.
“Түмэн” волонтердара дьон-сэргэ көмөнү аҕала туралларынан бэс ыйын 11 күнүттэн “Дьол түһүлгэтэ” уопсастыбаннай кииҥҥэ салгыы үлэлиэхтэрэ.
Майатааҕы “Түмэн” холбоһук салайааччыта Мария Лукина ыарахан быһылаан тахсыбытыгар бар дьоммут туора турбакка илиилэрин уунан көмөлөһө туралларыгар махталын тиэртэ.
Марелла Баишева.
