Улуус баһылыгын отчуота Хорообут бөһүөлэгэр күн иккис аҥаарыгар ыытылынна.
Дмитрий Тихонов улуус сыллааҕы үлэтин хайысхаларынан арааран, инники сылларга тэҥнээн сырдатта. Отчуоту 75 киһи иһиттэ. Мунньаҕы нэһилиэк баһылыга Гаврил Бродников салайан ыытта.
Хорообуттар төрөөбүт түөлбэлэрин сайдар суолун уһансар тоҕоостоох боппуруостары көхтөөхтүк ыйыттылар. Олохтоохтор нэһилиэккэ күөх төлөн ситимэ холбонуутун, «Мүрү» суол оҥоһуллуутун сытыытык туруорустулар. Суол туруга сайыҥҥы кэмҥэ мөлтөөн айан сырыытыгар ыарахаттары үөскэтэрин бэлиэтээтилэр. Ытык кырдьаҕастар невролог быраас өҥөтүгэр наадыйалларын эттилэр. Эдэр ыччат Күөнэхтээх, Бүлбүттээх күөллэр уолбуттарынан сибээстээн ууну хонтуруоллуур шлюз-регуляторы тутууга үп-харчы өттүнэн өйөбүл буолалларын туруорсаллар. Олохтоохтор нэһилиэккэ оптуобус сырыыта наадатын тоһоҕолоотулар. Кэтэх хаһаайыстыбаҕа сүөһүнү иитиигэ өйөбүл, үүтү туттарыы төлөбүрүн туһунан ырытыстылар.
Улуус баһылыга Дмитрий Тихонов оскуолаларга, уһуйааннарга оҕо ахсаана аччаан иһэрин, маннык балаһыанньа тыа сирэ сайдарыгар, үлэ миэстэтэ тахсарыгар мэһэйдэри үөскэтэрин эттэ. Ыччат тыа сиригэр олохсуйарыгар тыа хаһаайыстыбатын хайысхатын, олохтоох оҥорон таһаарыы үлэтин күүһүрдэр тоҕоостооҕун бэлиэтээтэ.
Изабелла Романова.
