Олунньу 19 күнүгэр эстэпиэтэ былааҕын күөрэччи тутан Алтан нэһилиэгин олохтоохторо Ходороҕо ыалдьыттаатылар.
Чүүйэлэр оһуокайдара эр дьон оһуокайынан саҕаланан төрүт түһүлгэни төрүттээн, барыта 33 эр киһи оһуокайы оройуттан туттулар. Эдэр кэскиллээх оһуокайы таһаарааччылар Давид Романов уонна Николай Игнатьев бүгүҥҥү күн Мэҥэлии оһуокай кэскиллээҕин өссө төгүл дакаастаатылар. Түмүккэ Маргарита Нестерова оһуокайыгар 48 кэрэ аҥар кыттыһан, барыта Ходоро түһүлгэтигэр 81 кыттааччы хабылынна. Чүүйэлэр оһуокайдара 4,12 баалынан сыаналанна. Кэскиллээх оһуокайы таһаарааччылар Давид Романов уонна Николай Игнатьев лауреат үрдүк аатын ылан, нэһилиэктэрин ааттаттылар.
Уус-уран оҥоһук быыстапкатыгар барыта 39 кыттааччы, 279 оҥоһугу туруордулар. Балаһыанньанан ирдэнэр үлэ сүрүн өттүгэр үлэлэр бааллар, аны сатабылы сайыннаран үрдүкү маастарыстыба таһымын баһылыырга дьүүллүүр сүбэ баҕа санаатын эттэ. Уран тарбахтаахтар көрүүлэрин лауреаттарынан Ньургуйаана Дмитриева, Александра Иванова, «Сыахай» түмсүү, Февронья Нестерова, Марфа Скрябина, Валентина Тимофеева буоллулар. Дипломант ааттара Ирина Аргуноваҕа, Александра Морозоваҕа, Екатерина Федороваҕа, «Сиэл» түмсүүгэ, «Кырадаһын абылаҥа» куруһуокка, «Туойдаана» түмсүүгэ, Елена Федороваҕа, Дмитрий Скрябиҥҥа иҥэрилиннилэр. Чүүйэлэр быыстапкалара 4,05 баалынан сыаналанна.
Успуорка доҕордуу көрсүһүүгэ, элбэх көрүҥҥэ кыайыылааҕынан тахсаннар, чүүйэлэр 25:10 очукуолаах өрөгөй үөрүүтүн биллилэр.
Алтан нэһилиэгин уус-уран самодеятельноһын кэнсиэригэр барыта 56 киһи кытынна. Кэнсиэр ыйыллыбыт нүөмэрдэртэн таҥыллан туруоруллубут, быйыл ордук сыанаҕа кэтэр таҥас-сап тупсубутун дьүүллүүр сүбэ биһирээтэ. Ол эрэн, тиһиктээх үлэ бөлөхтөрү кытары ыытыллыытын сайыннарыыны уонна режиссер көрүүтүн киллэрэн кэнсиэри биир ситимнээх гына туруорууга күүстээх үлэ наадатын ыйдылар.
Түмүккэ, лауреат үрдүк аата хор коллективыгар «Тыыннаахтар умнубат сыллара» ырыатын иһин, уус-уран ааҕыы кэлэктиибитгэр, «Саһарҕа» дьахталлар ансаамбылларыгар уонна үҥкүү бөлөҕөр «Дьиэрэҥкэй» үҥкүүтүн иһин иҥэриллэннэ. Дипломант аатын ылан Валентина Петрова, үҥкүү бөлөҕө «Синий платочек» үҥкүүтүнэн, Михаил Иванов уонна Татьяна Очегасова сольнай ырыалара, «Эр киһини атыылыыбын» сценка уонна ыччат блогун туруоруута биһирэннилэр.
Алтан нэһилиэгин уус-уран самодеятельноһын кэнсиэрин дьүүллүүр сүбэ 4,03 баалынан сыаналаата.
Бу курдук, улууспут дьонун сомоҕолуур модун күүстээх В.К.Степанов аатын сүгэр 68-с култуура уонна успуорт эстэпиэтэтэ иккис бөлөххө тыҥааһыннаахтык бара турар.
Галия Сосина,
култуура уонна духуобунай сайдыы управлениетын иһитиннэрэр-мэтэдиичэскэй киинин салайааччыта.
