Ахсынньы 10 күнүгэр Д.Ф.Ходулов аатынан норуот айымньытын дьиэтигэр Ходоро нэһилиэгэр саҥа култуура киинин тутуутугар күүс-көмө буолар атыы-эргиэн дьаарбаҥка ыытылынна.
Майа сэлиэнньэтин олохтоохторугар уонна ыалдьыттарыгар Чүүйэ олохтоохторо минньигэс собону, сир аһыттан араас барыанньалары, ынах уонна убаһа этин, иһин, хаанын, үрүҥ ас арааһын уо.д.а. бэйэ бородууксуйатын атыыга аҕаллылар.
Саргылана Атласова, М.Т.Данилова–Хатын Ай аатынан култуура киинин дириэктэрэ:
– «Дойдум минньигэс аһа» дьаарбаҥкаҕа нэһилиэк «Чараҥ» (сал. Елена Захарова), «Айылгы» (Екатерина Охлопкова), «Алгыс» (Марианна Степанова), «Саһарҕа» (Вероника Дмитриева) түөлбэлэр бэйэлэрин бородууксуйаларын көхтөөхтүк атыылаатылар. Маны тэҥэ дьоҥҥо-сэргэҕэ Аркадий Дмитриев хаһаайыстыбата саха боруода ынаҕынан үүтүн, арыытын атыыга аҕалла. Атыы-эргиэн уонна «Чүүйэм алгыстаах аартыгынан» кэнсиэр билиэттэрин харчыта саҥа култуура киинэ тутуутугар барыаҕа. Түгэнэн туһанан күүс-көмө буолар нэһилиэгим олохтоохторугар, түөлбэлэрбэр, кэнсиэргэ кыттыбыт артыыстарга уонна Д.Ф.Ходулов аатынан норуот айымньытын дьиэтин кэлэктиибигэр, чуолаан салайааччыларыгар Екатерина Ефремоваҕа махталбын тиэрдэбин, – диэтэ.
Иван Лукин.
