Улуус баһылыга Дмитрий Тихонов салайааччылаах отчуоттуур бөлөх күн иккис аҥаарыгар 2‒с Наахара нэһилиэгэр тиийэн олохтоохтору кытары көрүстэ. Мунньахха дьон-сэргэ көхтөөхтүк кытынна, 81 киһи кэллэ.
Олохтоохтор сүрүннээн нэһилиэк дьонун уопсай кыһалҕатын таарыйар уопсайа 21 ыйытыыны биэрэн хоруйдары ыллылар. Эдэр исписэлиистэри олохсутууга олорор дьиэ тутуутун, уот остуолбаларын саҥардыыны, кэтэх хаһаайыстыбаларга тиэхиньикэни лизинг нөҥүө атыылаһыыны сөргүтүүнү, уу таһар массыынанан хааччыллыыны, гаас ситимин тардыыны, дьиэлэрэ ууга бара сылдьыбыт саастаах дьоҥҥэ өрөмүөҥҥэ көмөнү о.д.а. ис хоһоонноох этиилэрин киллэрдилэр, кыһалҕаларын туруорустулар. Бу күн бөһүөлэккэ «Хаарбах дьиэттэн көһөрүү» бырагырааматынан 23 кыбартыыралаах олорор таас дьиэ киллэриллибитигэр махтанан туран, бу хайысханан үлэ салҕанан өссө саҥа тутуулар ыытыллалларыгар баҕа санааларын эттилэр.
Улуус баһылыга Дмитрий Тихонов атах тэпсэн олорон санааларын, этиилэрин аһаҕастык үллэстибиттэригэр, отчуот мунньаҕар көхтөөхтүк кыттыбыттарыгар олохтоохторго махтанна уонна кинилэр туруорсуулара, этиилэрэ барыта боротокуолга киллэриллэн түмүллэн үөрэтиллэригэр уонна боломуочуйа иһинэн кыах баарынан быһаарыллалларыгар үлэлэһтэхпит диэн эттэ.
Алена ДОКТОРОВА.
