Мэҥэ Хаҥаластааҕы дьиэ-уот, хомунаалынай хаһаайыстыба Хочотооҕу учаастагар гаас инженерэ идэлээх Василий Шестаков маастарынан үлэлээбитэ икки сыл буолла. Ол тухары туруорсан-туруорсан быйыл дьэ кыбартааллааҕы хочуолунайга хапытаалынай өрөмүөн барарын ситистэ.
Василий Иннокентьевичтан аҕыйах ыйытыыбар хоруйдууругар көрдөстүм.
– Василий Иннокентьевич, ааспыт кыстыгы хайдах туораатыгыт?
– Кыстыгы этэҥҥэ туораатыбыт. Ыарахаттар суох буолбатахтар, бааллар. Хочуолунайбыт кыамтата кыра буолан, наадалаах итиини биэрбэт. Буруону таһаарар турбабыт соҕотох (урукку бэдэрээтчит оннук оҥотторбут), ол иһин оһох тардыыта тиийбэт буолан сөптөөх итиинэн хааччыйбат. Хамнас кэлиитэ эмиэ уустуктардаах. Бу барыта үлэни-хамнаһы атахтыыр.
– Кэлэктиипкэр хас үлэһиттээххиний? Үлэ эрэсиимин тутуһуу хайдаҕый?
– 20 үлэһит баар, бу ситэтэ суох, инньэ гынан сорох уолаттар иккилии ноҕоруусканы толороллор. Барыта олохтоох, бэйэбит дьоммут үлэлииллэр. Үлэ эрэсиимэ сүнньүнэн тутуһуллар, биирдэ эмэ кэһиллии таҕыстаҕына, тутатына миэстэтигэр быһаарабыт.
– Чулуу үлэһиттэриҥ кимнээхтэрий?
– Уолаттар бары да үлэҕэ эппиэтинэстээхтик сыһыаннаһаллар. Ол гынан баран тустаах үлэлэрин таһынан субуотунньуктарга эҥин инники күөҥҥэ сылдьалларынан атыттартан чорбойор дьонум – Сергей Константинович Яковлев, Николай Иннокентьевич Давыдов, Василий Васильевич Григорьев, Григорий Михайлович Васильев.
– Кэлэн иһэр кыстыкка бэлэмнэнии үлэни саҕалаабыккытын көрдүм. Туох үлэлэр барыахтаахтарый?
– Мин 2 сыл маастарынан үлэлээтим. Ол кэм устата туруорсаммын, дьэ быйыл сайын кыбаартал хочуолунайыгар хапытаалынай өрөмүөн барарын ситистим. Оһохпут уларыйбат, ол оннугар 4 буруо тахсар турба туруохтаах. Бу иннинэ соҕотох турба баара. Бу күннэргэ эргэни көтүрүү үлэтэ бара турар. 10 миэтэрэ үрдүктээх турбаны быһыта тэптэрэн түһэриэхпит. Ол оннугар саҥа турбалары олордуохтаахпыт. Дьэ оччоҕо оһохпут тардыыта күүһүрүөҕэ.
Мэҥэ Хаҥаластааҕы ДьУоХХ ГУТ дириэктэрэ Иннокентий Эдуардович Яковлев өйөөһүнүнэн өрөмүөҥҥэ туттуллар матырыйаалынан хааччылынныбыт, Майаттан үлэһит уолаттар кэллилэр.
– Майаттан кимнээх үлэлии кэллилэр?
– АДС сулууспатын начаалынньыга Людомир Павлович Романов бэртээхэй үлэһит уолаттары ыытта: Иван Иванович Романов, Александр Иннокентьевич Борисов, Николай Васильевич Скрябин, Василий Егорович Васильев, о.д.а. Дьэ бу уолаттар сүгэр-көтөҕөр, сыбааркалыыр о.д.а. үлэлэри толоруохтаахтар. Кинилэргэ бэйэбит дьоммут көмө-ньыма, көх-нэм буолаллар: Сергей Константинович Яковлев, Иннокентий Иннокентьевич Тимофеев. Мин бэйэм эмиэ тэҥҥэ сылдьан хонтуруоллуубун, наада буоллаҕына, сүгэбин-көтөҕөбүн.
– Василий Иннокентьевич, сэһэргээбиккэр махтанабын уонна кэлэн иһэр кыстыгы этэҥҥэ туоруургутугар баҕарабын.
Елена Прокопьева,
уопсастыбаннай кэрэспэдьиэн.
