Майаҕа Д.Ф.Ходулов аатынан култуура киинигэр кулун тутар 10 күнүгэр СӨ култууратын үтүөлээх үлэһитэ, норуот тапталлаах ырыаһыта Сардаана Осипова 60 сааһын бэлиэтиир үбүлүөйдээх дьоро киэһэтигэр ыраахтан-чугастан сааланы толору көрөөччү кэллэ. Дьоро күнүн кэнсиэрин Сардаана Ревовна бэйэтэ ыытта. Улахан экрааҥҥа олоҕун бэлиэ түгэннэрэ көстө турдулар.
Бу киэһэ хатыламмат ураты кэрэ, нарын куоластаах ырыаһыт норуот кини толоруутугар олус сөбүлээн истэр “Майа сайына” ырыатынан дьоро киэһэтин арыйда. Салгыы сүгүрүйээччилэригэр ааспыт кэм ахтылҕаннаах ырыаларын сэргэ саҥа ырыаларын бэлэх уунна. Кэнсиэри М.К.Попова аатынан ускуустуба оскуолатын учууталлара Дмитрий Санников, Даниил Алексеев уонна Мария Окорокова тыыннаах доҕуһуолунан киэргэттилэр.
Сардаана Осипова биир уратытынан кини биир дойдулаахтара айбыт ырыаларын толоруута буолар. Кини бу киэһэ Николай Сорокин, Александр Дмитриев-Чүмэчи, Владимир Кузьмин, Галина Шахурдина, Иннокентий Гаврильев-Лэкиэс уостан түспэт ырыаларын толордо. Тапталлаах ырыаһыппыт сүгүрүйээччилэрэ саха нарын иэйиилээх ырыаларын тэҥҥэ ыллаһа олордулар.
Ырыаһыт чугас доҕотторо: СӨ култууратын үтүөлээх үлэһитэ Александр Дьячковскай– Саарын, “Ырыа ыллыгынан сулустардыын” бырайыак кыттыылаахтара, норуот эмчитэ Зоя Горохова уонна Сунтаартан Юрий Михайлов ыалдьыттаатылар. Сардаана Осипова бэйэтэ салайар ырыа ансаамбыллара “Сыккыс”, “Сардаана”, Линда Захарова кытыннылар, Клим Федоров видео эҕэрдэ ыыппыт.
Ырыаһыт Амма улууһун Эмис нэһилиэгэр олорор Матрена Тимофеева-Самаана хоһоонугар Герасим Павлов дьүрүлүгэр “буруолуу сылдьар” “Эн эрэ” саҥа ырыаны кэргэнигэр анаан оҥорторбутун дохсун ытыс тыаһыгар толордо.
Бэлиэ күҥҥэ Мэҥэ Хаҥаластааҕы култуура уонна духуобунай сайдыы управлениетыттан салайааччы солбуйааччыта Александр Кулешов “Сардаана Ревовнаны төрөөбүт күҥҥүнэн уонна үбүлүөйдээх айар киэһэҕинэн итиитик-истиҥник эҕэрдэлиибит! Бу 2 чаастаах кэнсиэри олус астына-дуоһуйа көрдүбүт уонна инникитин да ырыаҕынан үөрүүнү бэлэхтии тураргар баҕарабыт” диэн туран эҕэрдэ суругу, сибэкки дьөрбөтүн итиэннэ СӨ уус-уран оҥоһуктарга маастара Саргылаана Ефремовна Сергучева айбыт-оҥорбут толору дьэдьэннээх ыаҕайатын бэлэх уунна. Майа дьаһалтатыттан баһылыгы социальнай боппуруостарга солбуйааччы Наталья Пахомова үөрүүтүн бэлиэтин “Халыҥ хаары ириэрэн, сүрэхпитигэр сардаана сибэкки тылыннардыҥ” диэн туран “Сэлиэнньэ сайдыытыгар кылаатын иһин” түөскэ кэтиллэр бэлиэни үөрүүлээхтик туттарда. Д.Ф.Ходулов аатынан култуура киинин дириэктэрэ Екатерина Ефремова эҕэрдэтигэр Сардаана Ревовна 2003 сылтан биир тэрилтэҕэ үлэлии сылдьарын үрдүктүк сыаналыырын бэлиэтээн эттэ. Бөкө култууратын киинин дириэктэрэ Айталина Иванова уонна исписэлииһэ Валентина Иванова эҕэрдэлээтилэр.
Майа сэлиэнньэтин анал байыаннай дьайыы кыттыылаахтарын дьиэ кэргэннэрин “Харыстаана” ырыа ансаамбылын аатыттан Күннэй Хасанова, оскуолаҕа бииргэ үөрэммиттэр ааттарыттан Алексей Павлов, аймахтар ааттарыттан Олег Кычкин, о.д.а. эҕэрдэлээн сибэкки дьөрбөтүн кытта өйдөбүнньүк бэлэхтэрин туттардылар.
Бу курдук салгыы ыллаан-туойан, дьоҥҥун-сэргэҕин үөрдэ-көтүтэ тур, биһиги чаҕылхай сулуспут!
Марелла Баишева.
