Бу күн иккис аҥаарыгар улуус баһылыгын 2024 сыллаах үлэтин отчуота Хара нэһилиэгэр буолла. Харатааҕы «Айыллаан» култуура киинин сылаас, сырдык саалатыгар олохтоохтор отчуоту истээри тобус-толору – 86 киһи буолан мустубуттар. Бу биир саамай элбэх истээччилээх көрсүһүү буолла.
Отчуоттуур мунньахха норуот дьокутаата Тихон Скрябин, оройуон сэбиэтин бэрэссэдээтэлэ Иннокентий Андросов кыттыыны ыллылар.
Улуус баһылыга Дмитрий Тихонов сыллааҕы үлэ отчуотун туруорбутун кэнниттэн олохтоохтор ыйытыыларга, этиилэргэ киирдилэр.
Оскуола таһыгар дьоҕус стадион тутуутун, оҕолору ыраас иһэр уунан хааччыйыыны, гаас тэрилин техническэй көрүү иһин сыана туохха олоҕуран ыараабытын, доруобуйаларынан хааччахтаах дьону дьиэнэн хааччыйыыга, олорор дьиэлэрин хапытаалынай өрөмүөннээһиҥҥэ үлэ хаамыытын, өрүһү туоруурга салгын олбохтоох суудуналары ылыыга үлэ ханна тиийбитин, о.д.а. ыйыталастылар.
Афанасий Илларионов киэн туттар биир дойдулаахпыт Василий Егоров аатынан «Чыпчаал» успуорт саалата саахалланар туруктааҕынан, инникитин аныгы ирдэбилгэ эппиэттиир сааланы тутууну туруоруста.
Олохтоох бэйэни салайыныыга киириэхтээх «КлиКра сокуонун» туһунан ыйытыы киирбитинэн, Ил Түмэн дьокутаата Тихон Скрябин уонна дьокутааттар оройуоннааҕы сэбиэттэрин бэрэссэдээтэлэ Иннокентий Андросов сиһилии быһааран биэрдилэр.
Тыа хаһаайыстыбатыгар боломуочуйа улууска бэриллэринэн, сүөһүнү аҕыйаппат туһуттан өйөбүлү сүөһү, сылгы ахсааныгар биэриэххэ диэн санааны Климент Лукин эттэ. Виталий Очиров нэһилиэк аайы сыл сахалыы бэлиэлэрин оҥоруохха, үүнэр сылга Иэйэхсит хотуну саҕан, дьоммут-сэргэбит, оҕолорбут сахалыы эйгэнэн дьоллонон, күн ахсын уйгуну-быйаҥы сомсоллорун түстүөҕүҥ, ону култуура эстэпиэтэтин ирдэбилигэр киллэриэҕиҥ диэтэ.
Урукку сылларга туттарбыт үүттэрин иһин дьон харчыларын ылбакка эрэйдэммитэ. Онон үбүлээһини сүөһү ахсаанынан тыырары өйүүбүн диэн Василий Назаров эттэ. Дьон-сэргэ олоҕор быһаччы сыһыаннаах саҥа сокуоннары нэһилиэнньэҕэ тиэрдиигэ, быһааран биэриигэ салалта өттүттэн ситэтэ суох үлэ ыытылларын сэмэлээтэ. Федот Харитонов өрөспүүбүлүкэ салалтата тыа хаһаайыстыбатын салаатыгар сөбө суох бэлиитикэтиттэн сүөһү-ас аҕыйаата диэн ыйда. Соҕотуопканы нэһилиэктэргэ биэриэххэ, бу сайдыылаах кэмҥэ аһы астыыры сатыыр дьонноохтор диэтэ. Сайыҥҥы өттүгэр оҕолорунан бөҕү хомуйтарбакка, Илья Назаров 40 сыл устата оҕолору үлэнэн ииппит үлэ-сынньалаҥ лааҕырдарын сөргүтүөххэ – үлэни кыайар, тиэхиньикэҕэ сыстаҕас оҕо инникитин айаҕын сатаан ииттэр диэн санаатын үллэһиннэ.
Сир ириититтэн үгүс кыһалҕа үөскүүр, онон бу боппуруоска хамыыһыйа тэрийэн улуус сирин-уотун чинчиттэрэри; хотону тутууга судаарыстыба үбүлүүр бырагыраамата баар буоларын; тыа хаһаайыстыбатын тиэхиньикэтин гаас уматыкка көһөрөр кэм кэллэ, онуоха сапараапкалыыр ыстаансыйалар элбииллэрин; нэһилиэк иһинэн ааһар муниципальнай суоллары өрөмүөннээһини; нэһилиэк саҥа түөлбэлэригэр гаас ситимин тардыыны, о.д.а. Хара нэһилиэгин сайдыытыгар туһуланар туруорсуулары баһылык Дария Назарова отчуоттуур бөлөххө тиэртэ.
Киирбит этиилэр, ыйытыылар бары боротокуолга киирэн, дьаһалта эһиилги сыллаах үлэтигэр ылыллыахтара диэн мунньаҕы Дмитрий Тихонов түмүктээтэ.
Февронья ОХЛОПКОВА.
