Саха көмүс тарбахтаах кэрэ аҥаардара өбүгэ саҕаттан талба талааннарынан, мындыр дьоҕурдарынан норуот уһун үйэлиинитигэр, кэрэҕэ-сырдыкка дьулуһуутугар силигилии үүнэр чиргэл силистии тирэх буолаллар.
Кинилэр сымнаҕас илиилэринэн имэрийэ тикпит сылаас таҥастара-саптара, иистэрэ-күүстэрэ тоһуттар тымныылаах тыйыс айылҕаҕа дьиэ кэргэннэрин, ону ааһан бүтүн норуот тыынын арчылыыра, уһун үйэлэниигэ алгыстыыра.
Өбүгэттэн бэриллибит төрүт ииспит көрүҥнэрин күн бүгүнүгэр диэри үйэтитэр, саҥалыы тыыннаан сайыннар кэрэ аҥаардар бааллара кэрэхсэбиллээх көстүү буолар. Хаатылыма нэһилиэгэр Туяра Попова салайааччылаах «Кыл, сиэл – Дьөһөгөй бэлэҕэ» уонна «Кыбытык иис» иистэнньэҥнэр холбоһуктара айымньылаахтык үлэлиир. Сиэлинэн, итиэннэ кыбытык иистэри сөргүтэр, үйэтитэр сыаллаах холбоһук дириҥ ис-хоһоонноох көрүөхтэн кэрэ оҥоһуктара бар дьон биһирэбилин ылар. Холбоһуктар үлэлэрин туһунан салайааччы Туяра Николаевна бу курдук сырдатар:
– Мин олохтоох кулуупка култуурунай тэрийээччинэн үлэлиибин. Оҕо сааспыттан иистэнэрбин, айарбын-тутарбын олус сөбүлүүбүн. Кэрэ айылҕалаах Хаатылымаҕа олохсуйуохпуттан иис холбоһугун биир интэриэстээх кулууп быһыытынан үлэлэтэр санаа үөскээбитэ. Инньэ гынан сиэлинэн, итиэннэ кыбытык ииһинэн дьарыктаныан баҕалаах кэрэ аҥаардары түмэн үлэлээбитинэн барбыппыт. Хаатылыма көмүс хатырыктаах ытык эбэлээх ураты айылҕатын, үлэһит дьонун-сэргэтин дьүһүйэр, кэскиллээх инникити түстүүр, итиэннэ Дьөһөгөй айыыга сүгүрүйүү суолталаах паннолары кыбытык ньыматынан тикпиппит араас быыстапкаларга дьон сэҥээриитин ылла. Сиэлтэн сөрүө, хатайдааһын (валяние) ньыматынан сылгы оҥоһугун симэҕин тикпиппит. Саҥа үлэбитинэн Аал Луук Мас бэлиэлээх кыбытык паннобут буолар. Бу үлэ култуура уонна успуорт эстэпиэтэтин быыстапкатыгар лауреат үрдүк аатын ылла.
Талааннаах иистэнньэҥнэрим Саргылаана Гаврильева, Евдокия Антонова, Евдокия Григорьева, Александра Дмитриева, Фаина Спиридонова, Валерия Саввина бука бары дьиэ кэргэн күн күбэй ийэлэрэ, эйэҕэс эбэлэрэ буолаллар. Үгүс түбүктээх олохторуттан быыс булан нэһилиэк уопсастыбаннай олоҕор көхтөөхтүк кытталларын иһин олус махтанабын. Бу курдук биир интэриэстээхтэр түмсэн айарбыт-тутарбыт нэһилиэкпит олоҕун сомоҕолуур.
Төрүт иискэ холонон, үлэлэһэн баран өбүгэлэрбит булугастарыттан-талыгастарыттан, мындыр толкуйдарыттан киһи сөҕөр уонна кинилэр талааннарыгар сүгүрүйэр.
Изабелла Романова.
