Гаврил Толстяков, улуустааҕы үөрэх управлениетын начаалынньыга:
‒ Саха Өрөспүүбүлүкэтигэр Российскай Федерация Бэрэсидьиэнэ В.В.Путин кэлэн барыыта устуоруйаҕа киирэр улахан суолталаах түгэнинэн буолла. Кылгас кэмҥэ да буоллар бэрт элбэх боппуруоска санааларын тиэртэ, быһаарыылары ылынна.
Чуолаан, биһиги, педагогическай уопсастыбаннас, Арассыыйаҕа үлэлиир «Земскэй учуутал» бырагыраама кэҥиирин сэҥээрэ иһиттибит. Ол курдук, урукку өртүгэр бу бырагыраамаҕа уопсай үөрэхтээһин тэрилтэлэригэр предметник-учууталлар эрэ кыттар буоллахтарына, салгыы оскуола иннинээҕи үөрэхтээһин педагогтара кыттар кыахтаныахтара. Каадыр тиийбэт сиригэр, чуолаан тыа сиригэр, бу дьаһал наадалаах уонна туһалаах буоларыгар саарбахтаабаппыт. Ону тэҥэ бырагыраамаҕа кыттар педагогтарга чэпчэтиилэр кэҥэтиллиэхтэрэ диэн Бэрэсидьиэн чопчулаан эттэ. Урукку өртүгэр биһиги улууспут чугас сытарынан «Земскэй учуутал» бырагыраамаҕа кыайан кыттыбат этэ, быйыл биир миэстэ көрүллэн куонкурус түмүгүнэн үрдүк таһымнаах, айымньылаахтык үлэлиир учуутал кэлэрин кэтэһэбит.
Биһиги өрөспүүбүлүкэбит IT-индустрия сайдыытынан Арассыыйа эрэгийиэннэрин ортотугар инники күөҥҥэ сылдьарын В.В.Путин илэ хараҕынан көрөн итэҕэйдэ. Бу хайысха сайдыытыгар үөрэҕирии тэрилтэлэрэ киллэрэр кылааттара улахан. «Үөрэҕирии» национальнай бырайыак чэрчитинэн оскуолаларга сыыппара үөрэҕирии эйгэтэ тэриллэн сайдыы күүскэ бара турар. Ону тэҥэ «Мин идэм ‒ IT» идэҕэ туһаайар бырайыакка биһиги оскуолаларбыт актыыбынайдык уонна ситиһиилээхтик кытталлар. Быйыл Аллараа Бэстээххэ «IT-куб» эбии үөрэхтээһин тэрилтэтэ аһыллыаҕа, оҕолорбутугар креативнай индустрия салаатыгар сысталларыгар кыахтара өссө кэҥиэҕэ. Бэрэсидьиэн ыраах сытар нэһилиэнньэлээх пууннарга түргэн интернети тиэрдэр наадатын, ол инниттэн спутниковай группировканы сайыннарар былаан баарын эппитин үөрэ иһиттибит.
Уһук Илин эрэгийиэҥҥэ талааннаах ыччаттарга анал истипиэндьийэлэр олохтонуохтара. Биир кэлим эксээмэннэри 100 баалга туттарбыт, Арассыыйа таһымнаах олимпиадаларга ситиһиилээхтик кыттыбыт Уһук Илин эрэгийиэн үрдүк үөрэҕин тэрилтэлэригэр киирбит устудьуоннар ити истипиэндьийэҕэ тиксиэхтэрэ. Биһиги улууспут оскуолаларын выпускниктара анал истипиэндьийэҕэ тиксэллэрин эрэнэ күүтүөҕүҥ. Кинилэр ортолоругар ситиһиилээхтэр үгүстэр.
Атын да хайысхаларга киирбит идиэйэлэр, саҥа быһаарыылар олоххо киирдиннэр, өрөспүүбүлүкэбит сайдыытын тэтимин түргэттиннэр.