Бүгүн, тохсунньу 28 күнүгэр, Ил Түмэн дьокутаата, Хаҥалас улууһун «Өктөөп 50 сыла» ТХПК бэрэссэдээтэлэ Тихон Скрябин “Биир ньыгыл Арассыыйа” баартыйа Саха сиригэр “Арассыыйа тыатын сирэ” федеральнай бырайыагын олоххо киллэриигэ, тыа сирин, тыа хаһаайыстыбатын сайыннарыыга туһуланар боппуруостарынан Мэҥэ Хаҥалас улууһун Араҥас нэһилиэгэр сырытта.
Тихон Николаевич өрөспүүбүлүкэҕэ баартыйа “Арассыыйа тыатын сирэ” федеральнай бырайыагын олоххо киллэриигэ салайааччы буолар. Ол чэрчитинэн, үлэтин сырыытынан кини “Тарат” тыа хаһаайыстыбатын кэпэрэтиибигэр сырытта. Манна пиэрмэр Петр Петров хаһаайыстыбатын үлэтин-хамнаһын билиһиннэрдэ. Петр Петрович икки хотоҥҥо 200-тэн тахса сүөһү кыстаан турарын, онтон 100-һэ ыанар ынах, ону таһынан, 100-чэкэ сылгылаахтарын кэпсээтэ. Манна барыта 12 үлэһиттээх. Бу күннэргэ ынахтар төрөөн эрэллэрин, билиҥҥитэ биэс ньирэй Күн сирин көрбүтүн, инники былааннарын сырдатта.
Үлэ дьонун көрсүһүүтүгэр Мэҥэ нэһилиэгин баһылыга, бааһынай хаһаайыстыба үлэтин-хамнаһын бэйэтинэн билэр Ньургун Габышев кыттыыны ылла. Кинилэр тыа хаһаайыстыбатын сайыннарар, үүт туттарыытын, оҥорон таһаарыы боппуруостарын тула кэпсэттилэр. Маны сэргэ, Ньургун Владимирович демография боппуруоһугар бэйэтин тус санааларын тиэртэ уонна ити боппуруоска салгыы үлэлииргэ бигэ эрэллээҕин эттэ.
Тихон Скрябин: “Өрөспүүбүлүкэҕэ тыа хаһаайыстыбата сайдарыгар манна үлэлиир хаһаайыстыбалар бары бииргэ үлэлиэхтээхпит дии саныыбын. Эдэр ыччат дэриэбинэҕэ кэлэн олохсуйуон, оҕо-уруу элбиэн наада. Оччоҕо тыа сирин сайдыыта түргэтиэ. Өрөспүүбүлүкэҕэ тыа хаһаайыстыбатыгар өйөбүл баар эрээри бүддьүөт өссө улаатыан наада. Доруобуйаҕа куттала суох бэйэ оҥорон таһаарар аһын-үөлүн дэлэтэргэ элбэх ыччат ылсан үлэлээн эрэрэ үөрдэр. Нэһилиэктэри өтөхсүппэккэ, тыа хаһаайыстыбатын бары салаатынан дьарыктанан, сайыннарар кыах баарын мүлчү тутумуоҕуҥ” — диэтэ.
Марелла Баишева.
