Улуустааҕы бэтэрээн сүбэтин сааһырыы култууратын үөскэтэр «Мындыр саас» бырайыагын чэрчитинэн муус устар 8 күнүттэн алта бөлөҕүнэн тыырыллан аҕам саастаах эр дьон күрэхтэһиилэрэ Өлөчөйтөн саҕаланна.
Олохтоохтор күрэхтэһии кыттыылаахтарын култуура дьиэтигэр олус тэрээһиннээхтик, истиҥник көрүстүлэр. Өлөчөйдөр икки хамаанданы туруорбуттар, Тараҕайдар кэлэннэр үс хамаанда хабылыкка-хаамыскаҕа, буулдьанан ытыыга, дарска уонна бильярга астына күрэхтэстилэр. Күрэхтэһиини улуус бэтэрээннэрин сүбэтин успуорка үлэни тэрийээччитэ Дмитрий Сидоров иилээн-саҕалаан ыытта, судьуйалаата. Дартс күрэхтэһиитин федерация салайааччыта, дарсы тарҕатааччы Евгений Птицын бэйэтинэн тиийэн быһааран, ыйытыыларга хоруйдаан, дьон бу көрүҥҥэ билиитин, сатабылын эбиннэ. Күрэхтэһии кыттыылаахтара бильярд успуордун бэркэ сэҥээрэллэр эбит, бу көрүҥү улууска сайыннарар, Майаҕа бильярд киинин арыйарга этии көтөхтүлэр.
Күн иккис аҥаарыгар «Эр киһи саҥата» диэн аһаҕас кэпсэтии тэриллэн, элбэх киһи санаатын үллэһиннэ. Кэпсэтиини улуус Ытык сүбэтин бэрэссэдээтэлэ Зиновий Игнатьев салайан ыытта. Күрэхтэһии ыҥырыылаах ыалдьыта, СӨ уонна РФ физическэй култуураҕа уонна успуорка үтүөлээх үлэһитэ, Мэҥэ Хаҥалас улууһун бочуоттаах олохтооҕо, успуорт бэтэрээнэ Афанасий Илларионов чөл олоҕу тутуһуу көдьүүһүн туһунан санаатын үллэһиннэ.
Кэпсэтиигэ кыттыы көхтөөх буолла, этиилэр боротокуолга киирдилэр. Аҕам саастаах эр дьон билиҥҥи кэмҥэ сытыытык турар тыын кыһалҕалары: нэһилиэктэргэ ыал буолуу быста аҕыйаабытын, суорумньуну эр дьон ылсыан сөбүн, билиҥҥи оҕо гаджекка убанан урукку оҕоҕо холооно суох этэ-сиинэ амньыраабытын, «Уол аҕатынаан» курдук күрэхтэһиилэри сир аайы тэрийэр тоҕоостооҕун, уолу үлэнэн уһуйууну сөргүтэр, өртөөһүнү ыытар наадатын, булка сыһыаннаах саҥа сокуоннар саха олоҕор-дьаһаҕар сөбө суохтарын, анал байыаннай дьайыыттан бааһыран, эчэйэн кэлбиттэри төттөрү ыыппакка, сыыйар бэрээдэги туруорсар уолдьаспытын эттилэр-тыыннылар. Сааһырбыт эр киһи дьиэтин-уотун көрүүнэн муҥурданан олорон хаалара сир аайы баарын, эр дьоҥҥо маннык тэрээһин ыытыллара үчүгэйин, сыллата буоллаҕына эр дьон көҕүн үрдэтиэҕин бэлиэтээтилэр.
Бу улууска бастакытын ыытыллар аҕам саастаах эр дьон күрэхтэһиитин үрдүк таһымнаахтык тэринэн көрсүбүт Алтан нэһилиэгин баһылыгар Николай Матчитовка, кулууп дириэктэригэр Прокопий Билюкиҥҥа, бэтэрээн сүбэтин бэрэссэдээтэлигэр Гаврил Поповка, бары кыттыбыт дьоммутугар махтанабыт. Бырамаҕа Наахара эргин аҕам саастаах эр дьоно түмсээри бэлэмнэнэллэр. Салгыы Лоомтукаҕа, Нөөрүктээйигэ, Төҥүлүгэ, Бэдьимэҕэ эр дьон түһүлгэтэ тэриллэн иһиэҕэ.
Үйэлээх муударас этэринэн, «Сааһырыахха сөп, кырдьар табыллыбат». Аҕам саастаах эр дьон – нэһилиэк бигэ тирэхтэрэ, омук тулааһыннара, кинилэр уопсастыба олоҕор көхтөөхтүк кытталлара үөрдэр.
Евдокия Решетникова,
улуус бэтэрээннэрин сүбэтин бэрэссэдээтэлэ.
