Елена Прокопьева, уопсастыбаннай кэрэспэдьиэн, педагогическай үлэ бэтэрээнэ, 2- Наахара нэһилиэгэ.
‒ Мин оҕо эрдэхпиттэн хаһыаты ааҕан улааппыт киһибин. Аан бастаан аахпыт хаһыатым ‒ «Бэлэм буол». Хаһыаты бэйэм ааҕан баран өссө дьоммор дорҕоонноохтук ааҕан иһитиннэрэрим. Оччотооҕу дьон үгүстэрэ үөрэҕэ суох этилэр, ол иһигэр ‒ биһиги төрөппүттэрбит. Ол да иһин буолуо, кинилэр хаһыаты олус күндүтүк көрөллөрө, сонуну истэн астыналлара. «Бэлэм буол» кэнниттэн оройуоммут хаһыатын «Колхоз кырдьыгын» (Кэлин «Ленинскэй знамя», «Эркээйи») сурутан ааҕарбыт. Улаатан, үлэһит буолан баран суруппут хаһыаттарым: «Комсомольская правда», «Учительская газета», «Эдэр коммунист», «Кыым», «Республика бүттүүнэ», «Саха сирэ» о.д.а. этилэр.
Билигин олох сайдан сонуну араас ханаалынан барытынан сомсобут диэххэ сөп. Ол гынан баран илиигэр хаһыаты тутан олорон ааҕарыҥ быдан астык дии саныыбын. Сөбүлээбит ыстатыйаҕын кырыйан ылан паапкаҕа уура сылдьан, наадыйдаххына хаттаан ааҕаҕын, дьоҥҥо ыытаҕын. Мантыҥ бэйэтэ туспа устуоруйа кэрэһитэ буолар! «Саһарбыт ыстараныыссалар тугу кэпсииллэрий? » диэнинэн салайтаран, хаһан эрэ буолан ааспыт олох түгэннэрин, алтыһан ааспыт дьонуҥ үлэлэрин-хамнастарын, дьылҕаларын хаттаан тилиннэрэн көрөҕүн. Хаһыат тиһиллибит подшивкатын үлэҕэр-хамнаскар, кинигэ таһаараргар туһанаҕын.
Аныгы тиэхиньикэни наһаа итэҕэйэн, кумааҕы хаһыаттарбытын суох гынымыаҕыҥ! Биир бэйэм ол-бу батсапка, телеграмҥа сүүс бырыһыан итэҕэйбэппин, сибээс хаһан баҕарар кэлэр-барар, сотуллар, оттон хаһыакка итэҕэйэбин, суруллубут ‒ суоруллубат!