Ахсынньы 19 күнүгэр Арассыыйа Бэрэсидьиэнэ Владимир Путин суруналыыстары кытта пресс-кэмпириэнсийэтигэр ааһан эрэр сыл түмүктэринэн быһа лииньийэнэн аһаҕас эпииргэ таҕыста. Маны дойду олохтоохторо үгүстэрэ кэтээн көрдүлэр.
Владимир Путин Саха сирэ түргэнник сайдарын, демографическай балаһыанньата үчүгэйин бэлиэтээтэ, байыаннай дьайыыга дойду көмүскэлигэр сылдьар биһиги байыастарбытынан киэн туттарын эттэ. Кини үүнэр сылга Судаарыстыба өртүттэн оҥоһуллар өйөбүллэри иһитиннэрдэ итиэннэ дойду олохтоохторун элбэх ыйытыктарыгар хоруйдаата. Оҕо төрүөҕүттэн саҕалаан, элбэх оҕолоох дьиэ кэргэҥҥэ туох өйөбүллэр баалларын, ханнык эйгэҕэ хамнас үрдүөхтээҕин, о.д.а. элбэҕи эттэ.
Бэрэсидьиэн быһа эпиирин көрөн баран Майатааҕы “Кэнчээри” оҕону сайыннарар киин салайааччыта, сэлиэнньэ дьахталларын сэбиэтин бэрэссэдээтэлэ Екатерина Романова санаатын үллэһиннэ:
‒ Элбэх киһи бүгүн киэһэ күөх экран нөҥүө Дойдубут Бэрэсидьиэнин этиилэрин болҕойон уонна интэриэһиргээн истибиттэрэ буолуо дии саныыбын. Миэхэ чугас боппуруостарынан дьиэ кэргэҥҥэ туһаайыллыбыт этиилэрэ буоллулар. Ол курдук, элбэх уонна кыра оҕолоохторго көмөлөр элбээн иһиэхтэрэ, намыһах дохуоттаах дьиэ кэргэҥҥэ тохсунньу 1 күнүттэн эбии көмөлөр баар буолуохтара диэбитэ үөртэ. Ону таһынан уһуйааҥҥа сыһыаннаах боппуруоска уһуйааннарга дьааһыла бөлөхтөрүн тэрийиини эттэ. Уһуйааннар үлэлэрин чааһын уһатыыны көрүөххэ наада диэтэ. Иитээччилэр ахсааннара оччотугар элбиирин, үлэһит хамнаһа, ыстаапката улахан буолуохтааҕын эттэ. Араас боппуруостар элбэх киирдилэр, онно барытыгар толору эппиэттээбитин олус кэрэхсээн көрдүм.
Марелла Баишева.