Мэҥэ Хаҥаластан 11 киһилээх көһө сылдьар биригээдэ от ыйын 29 күнүттэн атырдьах ыйын 6 күнүгэр диэри халаантан эмсэҕэлээбит Өймөкөөн улууһун Биэрэк Үрдэ диэн бөһүөлэгин олохтоохторугар көмөлөһөн кэллилэр.
Биригээдэ салайааччытынан дьуһуурунай диспиэтчэр улуустааҕы биир кэлим сулууспатын салайааччыта Афанасий Максимов сырытта. Афанасий Павлович айылҕа алдьатыытын көрсүбүт улууска көһө сылдьар биригээдэ көмөтүн туһунан иһитиннэрдэ:
– 11 киһи 4 бөлөххө арахсан 6 чааһынай дьиэлэргэ уонна 1 түөрт кыбартыыралаах уопсай дьиэҕэ араас үлэлэри ыыттыбыт. Ол курдук, икки дьиэҕэ муосталарын толору уларыттыбыт, биир түспүт дьиэҕэ салгылыыр бордууһуна оҥоһулунна. Охтубут күрүөлэри, халаан кэмигэр ууга устубут мастары, маллары сааһылааһын, кирилиэстэри, кырыыһалары оҥоруу, көннөрүү, дьиэ анныттан уу бырахтарыыта, дьиэлэр тулаларын арыйыы, буорун хаһыы, түннүктэри устуу, о.д.а. араас үлэлэри сарсыарда эрдэттэн киэһэ хойукка диэри олохтоохтор сайаапкаларынан үлэлээтибит.
Биригээдэҕэ улуустааҕы дьуһуурунай диспиэтчэр улуустааҕы биир кэлим сулууспатын 6 үлэһитэ, о.э. мин, сулууспа салайааччыта, оперативнай дьуһуурунайдар Борис Попов, Евгений Шестаков, дьуһуурунай көмөлөһөөччүлэрэ – “112 сулууспа” оператордара Кэскил Егоров, Игорь Захаров уонна Дмитрий Степанов сырыттыбыт. Маны таһынан улуус дьаһалтатын тырааныспар салаатын исписэлииһэ Айисен Терентьев, Хара нэһилиэгин дьаһалтатын землеустроителэ Айсен Лукин, Майа дьаһалтатын АХУМС тэрилтэтин үлэһитэ Тит Кривогорницын, Чүүйэ орто оскуолатын суоппара Василий Спиридонов уонна “Парус” успуорт уораҕайын суоппара Радомир Ксенофонтов баран үлэлэһэн кэллилэр.
Биригээдэ хас биирдии үлэһитигэр биир кэлим үлэлиир таҥаһынан, массыыналарбытыгар бэлиэ сурук, туттар тэрилинэн, аһынан-үөлүнэн хааччыйбыт улууспут дьаһалтатыгар, массыынанан хааччыйбыт тэрилтэлэрбитигэр махтанабыт. Уолаттар бары да сатабыллаахтарын көрдөрөн, дьиҥ ис сүрэхтэриттэн дьоҥҥо көмөлөһөн, араас тиэхиньикэни да үлэлэтэн, олохтоохтортон махтал тылларын тутан, бэйэлэрэ да астынан кэллилэр.
Кулууп дьиэтигэр олохтоон хоннордулар, «Чуораанчык» оҕо уһуйааныгар күҥҥэ үстэ аһаттылар. Биэрэк Үрдэ бөһүөлэккэ Өймөкөөн улууһун успуорт уонна ыччат салалтатын салайааччыта, улуус дьокутаата Андрей Стефанчук олохтоохтортон сайаапкалары хомуйан кэлбит биригээдэлэри аттартаан үлэни тэрийдэ. “Чуораанчык” оҕо уһуйаанын үлэһиттэрэ асчыт Алена Винокурова, иитээччи Юлия Готовцева, кулууп сэбиэдиссэйэ Федор Иннокентьевич күннэтэ аспытын-үөлбүтүн, туттар тэриллэрбитин, уубутун, хонукпутун быһаара сырыттылар. Биһигини сэргэ Нам улууһуттан 15 киһилээх биригээдэ үлэлэстэ. Төннөр күммүтүгэр 19 киһилээх ХИФУ устудьуоннарын тутуу этэрээтэ кэлэн хаалбыта.
Ыраах, тыйыс да дойдуга олордоллор, Өймөкөөн улууһун дьоно-сэргэтэ олус бэркэ дьаһанан, дьиэ-уот тэринэн, сүөһү-ас тутан, тиэхиньикэнэн хааччыллан олороллор эбит. Олохтоохтор бэйэ-бэйэлэригэр аймахтыы истиҥ сыһыаннаахтар, кыра да көмөҕө наһаа үөрүнньэҥнэр. Сибиэһэй үүт, сүөгэй, оҕурсу, балык, муорс амсаттылар. Бу бөһүөлэк толору киин ититэр ситимҥэ холбоммут, суолларын таас кутан бөҕөргөтөн сырыы хаайтарбат эбит. Бэйэлэрин дизельнэй ыстаансыйаларыттан кэлэр уот ситимин остоолболоро, боруобаттара саҥардыллыбыттар. Бөһүөлэккэ оскуола иннинээҕи саастаах оҕолор уһуйааннара үлэлиир, оскуола саастаах оҕолор 7-8 килэмиэтир тэйиччи турар нэһилиэк киинигэр, Өймөкөөн бөһүөлэгэр, баран үөрэнэллэр эбит. Билигин олохтоохтор олорор дьиэлэрин өрөмүөннүүр үлэттэн ордубакка сылдьаллар, аны отторун үлэтэ кэтэһэр. Ол да буоллар кыстыгы көрсөргө бэлэм буолуохпут диэн бүк эрэллээхтэр.
Күндү Өймөкөөн улууһун Биэрэк Үрдэ бөһүөлэк олохтоохторугар биһиги дьоҕус биригээдэбит аатыттан сылаастык, истиҥник көрсүбүттэригэр махтаныа этибит. Алдьатыылаах, хоромньулаах айылҕа саахала түргэнник ааһан, олох-дьаһах нус-хас киэбигэр төннө охсоргутугар баҕарабыт. Инникитин бөһүөлэк үүнэ-сайда, чэчирии турдун.
