Улуу Кыайыы 80 сылын Майа сэлиэнньэтин олохтоохторо өрө көтөҕүллэн көрсөллөр. Киин уулуссалар, тэрилтэлэр тастара былаахтарынан, былакааттарынан, түннүктэр эйэ холууптарынан, шардарынан, сибэккилэринэн киэркэйдилэр. Майинскай уулуссаҕа сарсыардаттан араадьыйанан сэрии сылларын, кыайыыны уруйдуур ырыалар дуорайдылар, хоһооннор ааҕылыннылар.
Бүгүн, ыам ыйын 8 күнүгэр, саҥардыллан оҥоһулла турар Кыайыы монуменыгар Ийэ дойдубут, эйэлээх олох туһугар турууласпыт, сэрии толоонугар сырдык тыыннарын толук уурбут, сайдыылаах олохпут оҥкулун оҥорсубут буойуннарбытыгар сүгүрүйүүбүт бэлиэтигэр ыытыллар “Өйдөбүнньүк чүмэчи” аахсыйаҕа кыттан эдэриттэн эмэнигэр тиийэ тыһыынчанан дьон-сэргэ тоҕуоруһа муһунна.
2009 сылтан ыытыллар Бүтүн Арассыыйатааҕы аахсыйаҕа сыллата кыттааччы ахсаана эбиллэр, оҕо-ыччат үгүһэ үөрдэр.
Мэҥэ Хаҥалас улууһун баһылыга Дмитрий Тихонов, улуустааҕы бэтэрээн сэбиэтин бэрэссэдээтэлэ Евдокия Решетникова, Майа сэлиэнньэтин баһылыга Алексей Неустроев, “Килбиэн” байыаннай дьайыылар бэтэрээннэрин сэбиэтин салайааччы Афанасий Сергеев кыттыыны ыллылар, бу күн дириҥ суолтатын бэлиэтээн туран, аахсыйаҕа кытта кэлбит дьонноругар-сэргэлэригэр махтаннылар.
Бу күнү биһиэхэ аҕалаары Аҕа дойду Улуу сэриитигэр 20 мөлүйүөн сэбиэскэй киһи олоҕо быстыбыта. Өстөөҕү утары уоттаах сэриигэ хорсун быһыыны көрдөрбүт ытык дьоммутун өйдөөн-санаан, кинилэр сырдык дууһаларыгар сүгүрүйэн, чуумпуруу мүнүүтэтэ буолла. Ол кэннэ устуоруйаны умнубаппытын туоһулаан, “Кыайыы 80 сыла” сурукка чүмэчилэри уматан уурдубут.
Маны сэргэ, “Саллаат хааһыта” аахсыйа үтүө үгэскэ кубулуйан ыытыллара, үүнэр көлүөнэ ыччакка сэрии ыар сылларын өйдөрүгэр-санааларыгар иҥэрэр, дойдуга бэриниилээх, түмсүүлээх буолууга иитэр.
Марелла Баишева.
