Гаврил КАПРИН. Таатта.
Мин табаарыһым Баһылай Куприянов бэйэтин үлэтин дуобат тириэньэрин быһыытынан өҥөтө улаханыттан сырыы аайы сөҕөбүн. Төһөлөөх элбэх оскуола үөрэнээччитин өй успуордугар уһуйан, Саха сирин, Арассыыйа, Аан дойду чөмпүйүөннэрэ оҥортоото.
Сүүрбэччэлии оҕону улахан куораттарынан, кыраныысса таһыгар илдьэ сылдьан күрэхтэһиннэриэх диэтэххэ дьэ уустук. Саха сирин оҕолоро өй-билии күрэһэр бэйэлэрин тэҥнээхтэрин кыайталаан, улахан саастаахтары кытта тэҥинэн күрэхтэһэн кыайталыыллара оһуобай улахан ситиһии дии саныыбын.
Саха омук кэлэр көлүөнэтин өй өртүнэн, таба толкуйдуур, тулуурдаах буоларга элбэх да оҕону чөл олоххо, көнө суолга, үчүгэйи арааран көрөргө, толкуйдуурга үөрэттэ. Хаһан эрэ Саха сирин бастакы Бэрэсидьиэнэ Михаил Николаев успуорт көрүҥнэригэр, дуобаты, саахыматы өрө тутар наадатын эппитэ мин дневникпэр суруллан хаалбытын ааҕан, Василий Куприянов сахатын дьонугар элбэҕи, туһалааҕы да оҥоро сылдьарыттан үөрэбин. Бу уустук кэмнэргэ ыччат сөптөөхтук толкуйданара хайаан да наада.
Баһылайга ырааҕы ыраах, ыараханы ыарахан диэбэккэ итиччэ элбэх оҕону соҕуруунан, хотунан илдьэ сылдьаргар үтүөҕэ кэрэҕэ угуйаргар, оҕо кэрэҕэ, үчүгэйгэ тардыһар эйгэтин күүһүрдэргэр, тугунан да сатаан кээмэйдэммэт үлэҕинэн махталбытын тиэрдэбит, хайгыыбыт. Сорох киһи биир оҕону куоракка илдьиэҥ дуо диэтэхтэринэ саллан акаастанар.
Тириэньэр маннык дьаныардаах үлэтин сыаналыахтара, өрө тутуохтара дии саныыбын. Эн хас биирдии оҕону толкуйдуурга үөрэппитиҥ, кэлин бэйэлэрэ истэригэр эйиэхэ махтаныахтара.Саха норуота өйдөөх, киэҥ-холку ыччаттардаах буолуута барыбыт үөрүүтэ, кыайыыта. Баҕа санаан туолан истин, өй күрэҕэр саха ыччата аан дойдуга ааттаннын.