Хара сэлиэнньэтин Арҕаа Куоҥ Харах алааһыгар доруобуйа харыстабылын үлэһиттэрин күнүгэр аналлаах үлэ үөһүгэр сылдьар үрүҥ халааттаах аанньаллар үрүҥ тунах ыһыахтара ыһылынна.
Ыһыах Арассыыйаҕа дьиэ кэргэн, Өрөспүүбүлүкэҕэ Оҕо саас, улууспутугар Тыа хаһаайыстыбатын, Майа сэлиэнньэтигэр Чөл олох сылыгар ананна. Ыһыаҕы Ф.П.Пивоварова аатынан сэллиги утары охсуһар диспансер, киин балыыһа төрүүр дьиэ салаатын үлэһиттэрэ тэрийэн ыыттылар.
Ыһыах сахалыы таҥастаах параадынан саҕаланна. Хас биирдии отделение, нэһилиэк балыыһаларын үлэһиттэрэ сэлэлии хаамтылар. Алгыс түһэр сиригэр мустан, төбүрүөннээн турдулар. Үтүө-кэрэ төлкөлөөх түһүлгэни алгысчыт Илгэлээх Испирдиэн аал уот оттон, кыынньар кымыһынан, арыылаах алаадьынан айах тутан алгыстаата-арчылаата. Алгыс түспүтүн кэннэ, былытыран турбут халлааҥҥа күн уота уруйдаан-айхаллаан чаҕылыйа тыган кэллэ.
Ыһыах үөрүүлээх чааһыгар улуус баһылыга Дмитрий Тихонов, Майа сэлиэнньэтин баһылыгын социальнай уонна имидж бэлиитикэтигэр солбуйааччы Вячеслав Санников, Хара нэһилиэгин баһылыга Дария Назарова, киин балыыһа кылаабынай бырааһа Алексей Павлов, улуустааҕы доруобуйа харыстабылын биир идэлээхтэрин сойууһун бэрэссэдээтэлэ Зоя Москвина эҕэрдэ тыллары эттилэр, наҕараадалар туттарылыннылар. Мэҥэ Хаҥалас оройуонун доруобуйа харыстабылын ситимигэр өр сыллаах үтүө суобастаах үлэлэрин, нэһилиэнньэ доруобуйатын харыстабылыгар сүҥкэн кылааттарын иһин «Мэҥэ Хаҥалас улууһугар доруобуйа харыстабылыгар сайдыытыгар кылаатын иһин» бэлиэнэн киин балыыһа бэтэрээнэ Валентина Васильева, киин балыыһа тэрийэр-мэтэдиичэскэй үлэҕэ кылаабынай бырааһы солбуйааччы Люция Матчитова наҕараадаланнылар. «Майа ‒ дойдум барахсан» бэлиэни киин балыыһа статиһа Татьяна Степанова, киин балыыһа рентгенологическай отделениетын санитарката Мария Сергучева туттулар.
Доруобуйа харыстабылын сайдыытыгар кылаатын иһин «Российскай Федерация доруобуйа харыстабылын туйгуна» бэлиэ киин балыыһа инфекционнай отделениетын мэдсиэстэрэтигэр Анна Даниловаҕа туттарылынна.
Доруобуйа харыстабылын идэлээх бырааһынньыктарынан, өр сыллаах таһаарыылаах үлэлэрин иһин «СӨ доруобуйа харыстабылын туйгуна» бэлиэнэн Төҥүлү амбулаториятыттан оҕо бырааһа Любовь Мордовская, киин балыыһа тымыр-сүрэх салаатын невролог бырааһа Софья Левина, сэллиги утары охсуһар диспансер медсиэстэрэтэ Ольга Васильева, Балыктаах амбулаториятын мэдсиэстэрэтэ Акулина Сотникова, Аллараа Бэстээх амбулаториятын мэдсиэстэрэтэ Тамара Скрябина, киин балыыһа стоматологическай салаатын мэдсиэстэрэтэ Евдокия Сазонова, оройуоннааҕы поликлиника акушерката Саргылана Захарова ыллылар.
СӨ фтизиатрическай сулууспаҕа кылаатын иһин «Саха сиригэр сэллиги утары охсуһууга үтүөлэрин иһин» бэлиэнэн сэллик диспансерын бырааһа Наталья Осипова наҕараадаланна. «Улуус доруобуйа харыстабылын Бочуоттаах бэтэрээнэ» бэлиэнэн Николай Кычкин, Татьяна Федорова, Антон Егоров, Людмила Данилова, Николай Никитин, Николай Слободчиков бэлиэтэннилэр.
Омурҕан кэннэ түһүлгэни көрүү куонкуруһа саҕаланна. Манна хас биирдии отделение дьиэ кэргэн дьарыгын, ситиһиитин сырдатта, чөл олоҕу көҕүлээтэ. Ону тэҥэ саламалаах үҥкүүгэ, хомуска биирдиилээн уонна бөлөҕүнэн оонньуурга куонкурустар, мас тардыһыытыгар, кыыһы эккирэтиитэ, көрдөөх стартарга күрэхтэһиилэр буоллулар.
Өбүгэ саҕаттан илдьэ кэлбит үгэспит, уһун унньуктаах кыстык кэнниттэн сайа сүүрэр салгыннаах, чаҕылхай күннээх самаан сайыммыт барахсан салаллан кэлбитин өрүү үлэҕэ эриллэ-мускулла сылдьар дьоммут биир күн түмсэн күөх окко көччүйэ оонньоон, күрэс былдьаһан, илин-кэлин түсүһэн, кылыһахтаах тойук, ырыа истэн дуоһуйан, күүс-сэниэ ылан сынньаннылар, алгыстанан-арчыланан санаалара бөҕөргөөн астынан тарҕастылар.
Елизавета Неустроева.
