Муус устар 3 күнүгэр Майаҕа Д.Ходулов аатынан норуот айымньытын дьиэтигэр улуустааҕы киин балыыһа үлэһиттэрин ааспыт 2024 сыллааҕы үлэтин түмүктүүр мунньаҕа буолан ааста.
Улуус кылаабынай бырааһа Иннокентий Павлов ааспыт сылга доруобуйа харыстабылын салаатын ситиһиилэрин билиһиннэрдэ, бары салааҕа көрдөрүүнү сыыппараларынан холобурдаан кэпсээтэ, үүммүт сылга ханнык хайысхаҕа болҕомто ордук күүһүрдүллүөхтээҕин ыйда. Кылаабынай бырааһы эмтиир үлэҕэ солбуйааччы Наталья Федорова «Уопсастыба доруобуйатын бөҕөрҕөтүү», кылаабынай педиатр Жанна Адамова «Доруобуйа харыстабыла. Саҥа национальнай бырайыактар. 2024 сыллааҕы педиатрическай сулууспа үлэтин түмүгүн туһунан» иһитиннэриилэри онордулар.
Дьон доруобуйата тупсарыгар, ыарыыны эрдэттэн булууга, сэрэтиигэ сылын аайы диспансеризацияны ыытыы улахан көмөлөөҕө ахтылынна. Ол хайысханан үлэ күүскэ барыахтааҕын тоһоҕолоон бэлиэтээтилэр.
Тэрээһин кыттыылаахтарын улуус баһылыгын социальнай боппуруостарга уонна имиджевэй бэлиитикэҕэ солбуйааччы Татьяна Егорова, улуус кылаабынай бырааһа Иннокентий Павлов, Майа сэлиэнньэтин баһылыгын бастакы солбуйааччы Дмитрий Игнатьев эҕэрдэлээн, кэккэ бастыҥ үлэһиттэргэ наҕараадалары туттардылар.
2024 сылга ыытыллыбыт үлэ түмүгүнэн «Бастыҥ быраас амбулаторията» Нөөрүктээйитээҕи быраас амбулаторията (сэбиэдиссэй Галина Никанорова) буолла. «Оройуоннааҕы киин балыыһа бастыҥ салаата» ааты терапевтическэй отделение кэлэктиибэ (сэбиэдиссиэй Светлана Ротарь), «Үлэни хааччыйыы бастыҥ салаата» ааты кадр уонна быраап боппуруостарын отдела (салайааччы Марфа Иванова) ыллылар.
«Бастыҥ быраас» анал аат оройуоннар икки ардыларынааҕы сүрэх, тымыр отделениетын сэбиэдиссэйигэр, кардиолог бырааска Марина Говороваҕа, «Бастыҥ орто медицинскэй персонал» аат оройуоннааҕы поликлиника ыстаарсай медицинскэй сиэстэрэтигэр Валентина Степановаҕа, «Бастыҥ алын медицинскэй персонал» аат оҕо отделениетын алын медицинскэй сиэстирэтигэр Юлия Корякинаҕа, «Бастыҥ персонал» аат Петр Кузьминҥа иҥэрилиннэ.
Тэрээһини Аллараа Бэстээхтээҕи быраас амбулаториятын кэлэктиибэ «Алгыс үҥкүүтүн», Николай Васильев-Айтамыл бэртээхэй ырыа толороннор киэргэттилэр.
Ирина Маркова, улуустааҕы киин балыыһа ыарыыны сэрэтиигэ бырааһа:
– Мунньахха доруобайа харыстабылын үлэһиттэрэ үүммүт сыл соруктарын дьүүллэстибит. Сүрүүннээн «Көхтөөх уһун үйэлэнии», «Дьиэ кэргэн», «Доруобуйаны харыстыыр саҥа технологиялар», «Көдьүүстээх экэниэмикэ» федеральнай национальнай бырайыактары, «СӨ уопсастыба доруобуйатын бөҕөргөтүү уонна доруобуйа харыстабылын тиһигин сайыннарыы стратегическай хайысхалара» диэн Ил Дархан ыйааҕын олоххо киллэриини хааччыйыы, о.д.а соруктары ырытыы, кэпсэтии, санаа атастаһыыта буолла, – диэн иһитиннэрдэ.
Иван Лукин.
