Бэс ыйын 6 күнүгэр Тумулга С.Н.Сивцев – Доллу аатынан норуот айымньытын дьиэтигэр СӨ норуоднай артыыһа, Саха АССР култууратын үтүөлээх үлэһитэ, Мэҥэ Хаҥалас улууһун, Төҥүлү, Тумул, Балыктаах нэһилиэктэрин Бочуоттаах гражданина, Саха сирин ырыа айааччыларын сойууһун чилиэнэ, “Гражданскай килбиэн”, “Норуот биһирэбилэ” бэлиэлэринэн наҕараадаламмыт биир дойдулаахпыт Галина Никитична Шахурдина сырдык аатын үйэтитэр “Ырыаҕа анаммыт олох” ахтылҕан түһүлгэтэ үрдүк таһымнаахтык ыытылынна. Манна Галина Никитична күтүөтэ, СӨ үтүөлээх юриһа, СӨ “Гражданскай килбиэн” бэлиэ хаһаайына, Ис дьыала министиэристибэтин бэтэрээнэ, полковник Николай Никитин, бииргэ төрөөбүт быраата, Ис дьыала министиэристибэтин уонна прокуратура бэтэрээнэ Николай Заровняев көҕүлээһиннэринэн норуот тапталлаах ырыа айааччытын олоҕун кэрчиктэрин сырдатар истиэндэ туруорулунна.
Истиэндэ арыллыытыгар Доллу нэһилиэгин баһылыга Николай Сивцев, Галина Никитична күтүөтэ СӨ үтүөлээх юриһа, СӨ “Гражданскай килбиэн” бэлиэ хаһаайына, Ис дьыала министиэристибэтин бэтэрээнэ, полковник Николай Никитин, бииргэ төрөөбүт быраата, Ис дьыала министиэристибэтин уонна прокуратура бэтэрээнэ Николай Заровняев, СӨ норуодунай артыыһа, Саха сирин ырыа айааччыларын сойууһун салайааччы Алексей Егоров, Мэҥэ Хаҥалас улууһун култуураҕа уонна духуобунай сайдыыга управлениетын начаалынньыга Анна Исакова, о.д.а. кыттыыны ыллылар.
Истиэндэ кыһыл лиэнтэтин Доллу нэһилиэгин баһылыга Николай Сивцев, Галина Никитична быраата Николай Заровняев, күтүөтэ Николай Никитин быстылар.
Галина Шахурдина айар үлэтин, олоҕун кэрчиктэрин үөһээ ааттаммыттары сэргэ, Мэҥэ нэһилиэгин баһылыга Александр Куприянов, “Балыктаах киэһэтэ” ырыа хоһоонун ааптара Павел Габышев, бииргэ үөрэммит доҕотторуттан СӨ тыатын хаһаайыстыбатын бочуоттаах бэтэрээнэ Анна Павлова, СӨ автотранспорын бочуоттаах үлэһитэ Никифор Баишев, аймаҕа, борокуратуура бэтэрээнэ Борис Попов, “Мозаика” үҥкүү норуодунай кэлэктиибин салайааччыта Михаил Сивцев, продюсер Антон Иванов, Майатааҕы М.К Попова аатынан оҕо ускуустубатын оскуолатын салайааччыта Василий Захаров, о.д.а. сүҥкэн талааннаах ырыа айааччы Галина Никитичнаны ахтан-санаан истиҥник-иһирэхтик сырдаттылар.
Тэрээһин кыттыылаахтарын “Доллу Хотуна” үҥкүү бөлөҕө “Күөллэриким” үҥкүүнэн эҕэрдэлээтэ.
Биир дойдулааҕа Арыйаан Свинобоев, Александр Дьячковскай – Саарын, Варя Аманатова, Владимир Индигирскэй, Сардаана Осипова, чугас аймахтара Антонина , Иван Прибылыхтар, о.д.а. Галина Шахурдина уостан түспэт ырыаларын долгутуулаахтык толордулар.
Марелла Баишева.