Муус устар 18 күнүгэр Бүтүн Арассыыйатааҕы үлэ дьаарбаҥкатын чэрчитинэн «Кыталык» уопсастыбаннай кииҥҥэ үлэ миэстэтин биэрэр тэрилтэлэр уонна үлэ көрдүүр дьон муһуннулар.
Үлэ дьаарбаҥкатыгар тутуу, тыа хаһаайыстыбатын, быраабы араҥаччылыыр, үөрэх, о.д.а., барыта 17 тэрилтэ 115 вакансия баарын туһунан кэлбит дьоҥҥо-сэргэҕэ билиһиннэрдилэр.
Роман Плотников, нэһилиэнньэ дьарыктаах буолуутун улуустааҕы киинин салайааччыта:
– Дьоммут үлэлээх, хамнастаах, баай-дуол олохтоох буолалларыгар үлэлиибит. Тэрээһиҥҥэ 72 киһи кэлэн кыттыыны ылла, онон бүгүҥҥү үлэбит түмүктээх, туһалаах буолла диэн эрэнэбит, – диэн иһитиннэрдэ.
