Муус устар 5 күнүгэр Чыамайыкыга тапталлаах эбэбит Дария Гаврильевна Семенова туһунан кыра кыыһа Аграфена Егоровна Васильева уонна улахан сиэнэ Тамара Афанасьевна Иванова хомуйан оҥорбут «Ийэбит алгыһынан арчыланан…» кинигэлэрин сүрэхтэниитэ буолан ааста.
Хос эбэм 1927 с. муус устар 1 күнүгэр күн сирин көрбүт. Кини 9 оҕо амарах ийэтэ, элбэх сиэннээх, хос сиэннээх. Бу соторутааҕыта 98 сааһын томточчу туолбута.
Тэрээһиҥҥэ аймахтар, нэһилиэк олохтоохторо, баһылык А.П.Захаров кытыннылар. Кыыһа, сиэнэ кинигэ хайдах оҥоһуллубутун кэпсээтилэр. Оҕолор, сиэннэр ыллаатылар, хоһоон аахтылар. Чугас дьоно эбэбит туһунан араас түгэннэри кэпсээн сэргэхситтилэр.
Кинигэҕэ Чыамайыкы нэһилиэгин ытык кырдьаҕаһа, нэһилиэк Бочуоттаах гражданина, элбэх оҕолоох тапталлаах ийэ, эбэ, хос эбэ Дария Гаврильевна олоҕун, дьоҥҥо-сэргэҕэ сыһыанын, оҕолорун иитиитигэр кыһамньытын, кинилэргэ ис сүрэҕиттэн күүстээх тапталын туһунан кэпсэнэр. Кини үтүө майгыта, эйэҕэс сыһыана оҕолорун, сиэннэрин санааларыгар, ис дууһаларыгар туохха да тэҥнэммэт үтүө өйдөбүл буолан уостан уоска тиһиллэн, үйэлэргэ кэлэр кэнчээри ыччаппытыгар кэрэ кэпсээн буолара саарбаҕа суох.
Ытык киһибит туһунан чугас дьонун, аймахтарын, оҕолорун, сиэннэрин ахтыылара, олоҕун үйэтитэр хаартыскалар, видеоматырыйааллар киирдилэр.
Хос эбэм туһунан кинигэ 5 түһүмэхтэн турар. 1 түһүмэх ‒ «Өбүгэлэрбит ситимнэрэ быстыбат». Эбэбит туһунан, кини төрөппүттэрин, бииргэ төрөөбүттэрин суруллубут уонна наҕараадалара киллэриллибит. 2 түһүмэх ‒ «Күн сирин көрдөрбүт көмүс чыычаахтара ‒ оҕолоро». Эбэм 9 оҕотун туһунан, кинилэр үлэлэрэ, ситиһиилэрэ киирбит. 3 түһүмэх ‒ «Дьиҥнээхтик таптаһар дьонтон төрөөбүт оҕолор ‒ дьоллоохтор». Оҕолоро ийэлэрин, сиэннэр эбэлэрин туһунан ахтыылара ыалларынан наардаммыт, үгүс хаартыскалаах. 4 түһүмэх ‒ «Хаан-уруу аймахтарбыт, чугас дьоммут». Аймахтарбыт, эбэбин чугастык билэр дьон ахтыылара киирбит. 5 түһүмэх ‒ «Кэлэр кэнчээри ыччаппытын өйөөн». 2010 сылтан саҕалаан, үөрэх дьылын түмүгүнэн оскуолабыт бастыҥ үөрэнээччитигэр, учууталга, техүлэһиккэ бэриллэр Егор Павлович Семенов аатынан эбээбит, кини оҕолоро кэргэттэринээн уонна учуутал сиэннэрэ туруорбут истипиэндьийэлэрин ким ылбытын бу түһүмэххэ билиэххэ сөп.
Тэрээһин кэннэ нэһилиэк баһылыга А.П. Захаров Улуу Кыайыы 80 үбүлүөйдээх сылыгар аналлаах Кыайыы мэтээлин Дария Гаврильевнаҕа оҕолорун, сиэннэрин ортотугар туттарда.
Настя Романова, Чыамайыкы орто оскуолатын 9 кылааһын, «Проба пера» эдэр кэрэспэдьиэнэ.
Кэскил / Детское издательство #юнкорычсош #чемоикинскаясош #кинигэсүрэхтэниитэ #презентациякниги #чыамайыкы