Андрей Захаров,
Ф.Г.Охлопков аатынан Майа орто оскуолатын дириэктэрэ:
Арассыыйа Бэрэсидьиэнэ Владимир Путин быhа эпииргэ сыл түмүгүнэн пресс-кэмпириэнсийэтин дойдубут дьоно олус интэриэhиргээн, сэҥээрэн көрдүлэр-иhиттиллэр. 4 чаастан ордук бириэмэ устата уопсайа 67 араас хабааннаах ыйытыкка хоруйдаата. Дьону-сэргэни ордук аска-үөлгэ сыана, доруобуйа харыстабылын, тырааныспар сайдыытын, экэниэмикэ, дойдуга куттал суох буолуутун, дьиэ кэргэн ипотеката салгыы үлэлээһинин о.д.а. боппуруостара догуталлар эбит.
Кэлэр сылга дойдуга тиийинэн олоруу алын кээмэйэ 18% улаатарын, Уhук Илин сайдыытыгар сыһыаннаах – хотугу эбилик төннөрүллэр, көтөр аал өҥөтүгэр чэпчэтии салгыы уһуур буолбутун, «Земскэй быраас» бырагырааманан тыа сиригэр кэлэн үлэлиир быраастарга судаарыстыба өйөбүлэ икки мөлүйүөҥҥэ диэри улаатарын сэҥээрэ иһиттим.
Бэрэсидьиэн «Сэриини полководецтар буолбакка, оскуола учууталлара уонна аҕабыыттар кыайаллар» диэн О.Бисмарк этиитин холобурдаан, билигин оҕону, ыччаты иитиигэ анал байыаннай дьайыыга инники күөҥҥэ сылдьыбыт 1000-тан тахса байыас үлэлии сылдьар диэтэ. Үүнэр көлүөнэни дойдуга бэриниилээх буолуу тыыныгар тус холобурунан иитии туохтааҕар да ордук көдьүүстээх диэбитин кытта бары сөбүлэһэбит.