В.П. Ларионов аатынан Майа орто оскуолатын үөрэнээччилэрэ Айыллаан Пивоваров уонна Айыллаана Аринкина Бүтүн Арассыыйатааҕы «Ворошиловский стрелок» күрэххэ өрөспүүбүлүкэ чиэһин ситиһиилээхтик көмүскээтилэр.
Айыллаан тус нормативы туттаран «Ворошиловский стрелок» диэн түөскэ иилиллэр бэлиэнэн наҕараадаланна. Үөрэнээччилэр Никандр Борисов салайааччылаах «Беркут» байыаннай-патриотическай кулуупка ситиһиилээхтик дьарыктаналлар.
Арассыыйа 67 эрэгийиэнин түмпүт киэҥ хабааннаах күрэх Анапа куоракка ыытылынна. Күрэхтэһээччилэр хамаанданы билиһиннэрэргэ, бэргэнник ытарга, гранатаны быраҕарга, күүс тургутууларыгар күөн көрүстүлэр. Айыллаан бириэмэнэн сүүрэ сылдьан ытыы, аптамааты хомуйуу уонна ыһыы көрүүлэрин ааһан үрдүк таһымнаах бэлиэни ылла.
«Ворошиловский стрелок» хамсааһын ССРС кэмигэр 1932 сыллаахха төрүттэммитэ. Ол саҕана Осоавиахим ытыы нормативын ситиһиилээхтик толорбут кыттааччылары түөскэ иилиллэр бэлиэнэн наҕараадалыыры олохтообута. Хамсааһын байыаннай дьыала наркомун Климент Ворошилов аатын сүгэр.
Никандр Борисов салайааччылаах «Беркут» байыаннай кулууп В.П.Ларионов аатынан Майа орто оскуолатыгар тиһиктээхтик үлэлиир. Уопсайа 50 үөрэнээччи хорсун-хоодуот санаалаах, төрөөбүт дойдуга бэриниилээх, сыыдам-сымса буола улаатарга уһуйуллаллар. Эдэр байыастар Бүтүн Арассыыйатааҕы «Юнармия» хамсааһыныгар киирэллэр. Сыллата ыытыллар «Зарница 2.0», «Путь воина» күрэхтэргэ ситиһиилээхтик кытталлар.
Изабелла Романова.
