Кулун тутар 17 күнүгэр Бөкөҕө нэһилиэк бэтэрээннэрин мунньаҕа ыытылынна.
Мунньахха Мэҥэ Хаҥалас улууһун бэтэрээннэрин сэбиэтин президиумуттан сэбиэт бэрэссэдээтэлин солбуйааччы Татьяна Скрябина, улуустааҕы Ытык Сүбэ бэрэссэдээтэлэ Зиновий Игнатьев, Майатааҕы холбоһук кураатара, «Түмэн» уопсастыбаннай тэрилтэ салайааччыта Мария Лукина, Майа сэлиэнньэтин бэтэрээннэрин сэбиэтин бэрэссэдээтэлэ Степан Копырин кыттыыны ыллылар. Кэлбит ыалдьыттар бэйэлэрин хайысхаларынан тустаах үлэлэрин, инники былааннарын сырдаттылар, сүбэ-ама биэрдилэр.
Мунньах сүрүн боппуруоһунан нэһилиэккэ бэтэрээн сэбиэтин бэрэссэдээтэлин талыы буолла. Куоластааһын түмүгүнэн бэрэссэдээтэлинэн култуура киинин дириэктэрэ Айталина Иванова талылынна.
Саҥа талыллыбыт бэрэссэдээтэл актыып хомуйан, былаан ылынан, ситиһиилээхтик үлэлииригэр баҕарыаҕыҥ.
Валентина Иванова.
