Ахсынньы 13 күнүгэр Саха Өрөспүүбүлүкэтин Бырабыыталыстыбатын бэрэссэдээтэлин бастакы солбуйааччы Дмитрий Садовников Хаҥалас уонна Мэҥэ Хаҥалас улуустарынан нэһилиэнньэлээх пууннарга тутуу үлэтин-хамнаһын билсэ сырытта.
Дмитрий Дмитриевич оробуочай сырыытыгар Майаҕа Байкалов аатынан уулуссаҕа тутуута түмүктэнэн эрэр 70 кыбартыыралаах дьиэни көрдө-иһиттэ, оройуон уонна «Мэҥэ-тутуу» тэрилтэ салалталарын кытта көрүстэ. Салгыы Чүүйэҕэ Комсомольскай уулуссаҕа тутулла 13 кыбартыыралаах саҥа таас дьиэ балаһыанньатын билистэ. Чүүйэҕэ тутууну «Алгысстрой» ХЭТ ыытар. Ити икки элбэх кыбартыыралаах дьиэ «Хаарбах дьиэттэн көһөрүү» федеральнай бырагырааманан үбүлэнэн тутуллаллар.
Өрөспүүбүлүкэ салалтатыттан сыл бүтэһигэр туттарыллыахтаах дьиэлэр хонтуруолланаллар. Дмитрий Садовников улууспутугар дьон олоҕун тупсарыыга анаммыт дьиэлэр-уоттар толору бэлэмнээх буолбуттарын бэлиэтээтэ. Майа дьиэтигэр билиҥҥитэ докумуоннаһыы өртө түмүктэнэн эрэр. Сотору кэминэн саҥа дьиэ күлүүстэрин олохтоохтор үөрүүлээх быһыыга-майгыга тутуохтара.
Чүүйэҕэ бэдэрээтчит тутуу үлэтин хаалбыт кылгас кэм иһигэр түмүктүүргэ дьулуһар.
Салгыы Аллараа Бэстээххэ тутулла турар Култуура киинин дьиэтигэр сырыттылар. Тутууну «СТК» тэрилтэ ыытар. Былааннаммыт үлэ этиллибит кэмигэр түмүктэнэрэ күүтүллэр.
