Бэс ыйын 20 күнүгэр СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников улууска ыытыллар тутуу үлэтин билсэ сырытта. Аллараа Бэстээх бөһүөлэгэр уонна Майа сэлиэнньэтигэр тутулла турар эбийиэктэри уонна суол-иис оҥоһуутун бэрэбиэркэлиир соруктаах улуус управлениеларын уонна тутуу үлэтигэр эппиэтинэстээх тэрилтэ салайааччыларын кытта көрүстэ.
Аллараа Бэстээх бөһүөлэгэр «Доруобуйа харыстабыла» национальнай бырайыагынан тутулла турар учаастактааҕы балыыһаҕа уонна Майа сэлиэнньэтигэр балыыһа комплексыгар сырыттылар. Бэстээххэ тутааччы «Основа» хааччахтаммыт эппиэтинэстээх тэрилтэ тутуу матырыйаалынан толору хааччыллан, дьиэ ис, тас өттүгэр үлэ тэтимнээхтик барар. Эбийиэк былаан быһыытынан бу дьыл сэтинньи ыйыгар үлэҕэ киллэриллиэҕэ. Майаҕа тутааччы «Адгезия» хааччахтаммыт эппиэтинэстээх тэрилтэ эбийиэк болдьоҕор туттарылларыгар үлэ тэтимин күүһүрдэригэр соругу туруордулар.
Майа сэлиэнньэтигэр «Хаарбах дьиэттэн дьону көһөрүү» бырагырааматынан тутулла турар элбэх кыбартыыралаах икки дьиэҕэ үлэһиттэри кытта көрүстүлэр. Күн бүгүн «Мэҥэ тутуу» тэрилтэ Исаев аатынан уулуссаҕа турар дьиэни 65 бырыһыан уонна Дьоруой Попов аатынан уулуссаҕа тутууну 30 бырыһыан толорбут.
Итиэннэ «Мүрү» өрөспүүбүлүкэтээҕи суолга Майаттан Ураһалаах алааска диэри 3 км 200 миэтэрэ уһуннаах суолга “Мегинские автомагистрали” хааччахтаммыт эппиэтинэстээх тэрилтэ аспааллааһын үлэтин тигинэччи ыыта турара бэлиэтэннэ. Тутааччылар эбийиэктэри болдьоҕор үлэҕэ киллэрэллэригэр күннэтэ хонтуруол ыытыллар.
