Улуу тириэнэр Дмитрий Коркин төрөөбүтэ 95 сылыгар аналлаах норуоттар икки ардыларынааҕы көҥүл тустууга аһаҕас 14-с турниры толору икки күн сэргээн көрдүм-иһиттим. Ааҕааччыны кытары аан маҥнай бэрт кыратык ааспыт кэм ыстараныыссаларын арыйан көрүөххэ. Бастакы күрэхтэһии 1990 с. тэриллибит. 2008 сылтан дьэ тохтообокко ыытыллан кэлбит. Ити кэмнэргэ араас судаарыстыба бөҕөстөрө, ол курдук Америка, Грузия, Польша, Украина, Азербайджан, Молдова, Венгрия, Япония, Куба, Белоруссия о.д.а. кыттан кэлбиттэрэ.
Быйыл кыраныысса таһыттан 15 судаарыстыба спортсменнара биһиэхэ кэлэн бардылар. Олортон биир саамай үрдүк ситиһиилэрдээх Иран тустууктара буоллулар. Кинилэр эт-хаан, күүс-уох өртүнэн сайдыылаах, кыахтаах-уохтаах омук буолалларын итэҕэтиилээхтик көрдөрдүлэр. Манна 18–23 саастаах эдэр тустууктарын аҕалбыттар. 125 киилэҕэ күрэхтэһээччилэрин кыайа, баһыйа туппут 18 саастаах, оҕолорго түөрт төгүллээх аан дойду чөмпүйүөнэ Амирреза Масуми ыарахан ыйааһыҥҥа кэскиллээх бөҕөс тахсан эрэрин, элбэх киһи бэлиэтии көрдө.
Константин Капрынов, Роман Николаев, Ньургун Сергин уонна иккис Бочуоттаах миэстэҕэ тигистилэр, саха да бөҕөстөрө үрдүкү ыйааһыҥҥа баалларын биллэрдилэр. Коркин турнирын алтыс төгүлүн кыайыылааҕа Виктор Рассадин “Үрүҥ көмүс борцовка” анал бириис хаһаайынынан буолуон буолла. Кини 2014 с., 2015 с. 57 кг, 2017 с. 61 кг, 2018 с., 2019 с. 65 кг бастаталаабыта. Бэрт сотору 30 сааһын туолуохтаах бөҕөспүт олох үчүгэй пуорматыгар сылдьарын көрдөрдө, үүнэн иһэр тустууктарга холобур буолла. «Сүрүн сыалым, Парижтааҕы Олимпиадаҕа кыттар путевканы ылыы», – диэн кини аһаҕастык эттэ. Ити курдук быстах бэлиэтээһиннэрим кэнниттэн, Д.П.Коркин төрөөбүтэ 95 сылыгар аналлаах көҥүл тустууга мемориал үрдүкү таһымҥа, уратытык тэриллэн ааспытын этэн туран манныктарга тохтуубун.
Күрэхтэһии иккис күнүгэр, балаҕан ыйын 8 күнүгэр киэһэ, финал хапсыһыыларын эрэ иннигэр, үөрүүлээх тэрээһин, турнир аһыллыытын быһыытынан барда. Бөҕөстөр 90 бырыһыантан ордуктара көбүөргэ тахсан бүтэн, көрөөччү буолан, чугастааҕылар ким эрэ өссө дьиэтигэр-уотугар, ким эрэ айанныы сырыттаҕына, күрэхтэһии бүтэрэ 2–3 чаас хаалбытын кэннэ табыгаһа суох курдук. Көннөрү Д.П.Коркин төрөөбүтэ 95-с сылыгар аналлаах тэрээһин, успуорт бырааһынньыгын быһыытынан биллэриллэн барыан сөптөөҕө.
Сылын ахсын тас, атын дойдуттан кэлбит спортсменнар турниры киэргэтэн, байытан, таһымын үрдэтэн бараллара көрөөччүнү үөрдэр уонна улахан интэриэһи үөскэтэр. Кинилэр киин сирдэртэн тэйиччи, ойуччу турар хотугу кыраайбыт күндү ыалдьыттара буолаллар. Ону сыаналаан биир саамай бастыҥнарыгар сахалыы өйдөбүнньүк сувенир туттарыахха сөп этэ. Холобура быйылгы сылга Ирантан Амирреза Масуми ылыан сөптөөҕө. Ити улахана суох курдук эрээри өрөспүүбүлүкэбит, Арассыыйа туһунан эдэр дьоҥҥо сылаас өйдөбүлү хаалларара саарбаҕа суох.
Турнир былаһын тухары сүрүннээн нууччалыы, ардыгар английскайдыы тыллар иһиллэллэр. Оннук да буолуохтаах. Ол эрэн саамай түмүккэ, финал хапсыһыыларыгар ыҥырыыга, муҥ саатар онно сахалыыны эбэн биэриэххэ. Бэйэни сэнэнимиэххэ, анаан-минээн көрө кэлбит успуорду сэҥээрээччилэр, күөх экраҥҥа сыстан олорон көрөөччүлэр сүрүннээн сахалар буоларбытын, түһүлгэ бэйэбит дойдубутугар ыытылла турарын умнумуохха.
Дмитрий Петрович Коркин кэриэһигэр ыытыллар түһүлгэ тиһигин быспакка сылын ахсын барарыгар , кини сырдык аата көлүөнэттэн көлүөнэҕэ бэриллэн иһэригэр баҕарабыт.
Степан АНДРЕЕВ.
Майа.
