Кулун тутар 31 күнүгэр Нам сэлиэнньэтигэр Ньургун Тимофеев аатынан култуура уонна успуорт киинигэр бэтэрээннэр икки ардыларыгар өрөспүүбүлүкэтээҕи дартс күрэхтэһиитэ буолла. Манна барыта 6-лыы киһилээх 9: Мэҥэ Хаҥаластан 2, Уус Алдантан 1 уонна Нам улууһуттан 6 хамаанда кытыннылар.
Мэҥэ Хаҥалас улууһугар “Дартс” успуорт түмсүүтүн салайааччы Евгений Птицын Арассыыйаҕа тиийэ ситиһиилэрдээх. Кини бэйэтэ дьарыктыыр дьонуттан 2 хамаанданы туруоран 12 бэтэрээн спортсмены илдьэ баран кытыннарда уонна хамаанданан алтыс миэстэ буоллулар.
Нам улууһун Е.Никитина, Е.Флегонтова, П.Эверстова, Н.Максимов, С.Тимофеев, И.Данилов састааптаах хамаанда бастакы, П.Дьяконова, Н.Афанасьева, М.Никифорова, В.Дьяконов, С.Иванов, А.Марков састааптаах хамаанда иккис, И.Баишева, А.Парникова, М.Дураева, В.Сивцев, Г.Семенов, Е.Бурнашев састааптаах хамаанда үһүс бириистээх миэстэлэргэ тигистилэр.
Хамаанданан миэстэҕэ тиксибэтэхтэр ортолоругар салгыы “Большой раунд” оонньууга “Саҥа ааттар” күрэхтэһии ыытылынна. Манна дьахталларга Намтан Александра Бугаева бастакы, Мэҥэ Хаҥаластан Людмила Кычкина иккис уонна Александра Морозова, Стелла Яковлева үһүс миэстэлэри хааччыннылар. Эр дьоҥҥо Намтан Аполлон Охлопков бастакы, Мэҥэ Хаҥаластан Евгений Птицын иккис уонна Намтан Афанасий Софронов, Мэҥэ Хаҥаластан Виктор Корякин үһүс миэстэ буоллулар.
Онон “Большой раунд” оонньууга кыттан биһиэннэрэ 5 мэтээли хааччыннылар. Дьахталларга Майаттан Людмила Кычкина үрүҥ көмүс, Стелла Яковлева, Ороссолуодаттан Александра Морозова боруонса, эр дьоҥҥо Майаттан Евгений Птицын үрүҥ көмүс, Лоомтукаттан Виктор Корякин боруонса мэтээллэр хаһаайыннарынан буоллулар.
Бары кыттыбыт, миэстэлэспит успуорт бу көрүҥүн сэргээччилэргэ эҕэрдэ уонна инникитин үрдүктэн үрдүк ситиһиилэри баҕарабыт.
Марелла Баишева.
