Күһүҥҥү биир былдьаһыктаах үтүө күн, балаҕан ыйын 13-гэр, Дьабыыл нэһилиэгэр лиидэр Мичил Баишев көҕүлээһининэн ыччаттар Федот Баишев, Альберт Сыроватскай, Василий Баишев, Айысхан Богимов үлэ, успуорт бэтэрээнэ Анатолий Прокопьевич Стручков, үлэ бэтэрээнэ Светлана Афанасьева Сергучева дьиэ кэргэҥҥэ кэлэн хортуоппуйдарын хомуйан, умуһахха уган биэрэн үөрүүнү бэлэхтээтилэр.
Бу дьиэ кэргэн уоллара, педагог идэлээх Гаврил Стручков анал байыаннай дьайыы кыттыылааҕа. Хаһаайын Анатолий Прокопьевич «Саамай ыарахан үлэбитигэр кэлэн күүс-көмө буолан барбыттарыгар оҕолорбут барахсаттарга барҕа махталбытын биллэрэбит. Өрүү итинник дьоҥҥо көмөлөһөргүтүн үөрэ истээччибит. Тустаахха кэллэҕинэ, чахчы да, дьол эбит, саастаах дьон кыайбаппыт элбээн истэҕэ ээ. Оҕолорбутугар дьолу, олоххутугар ситиһиини, чэгиэн доруобуйаны баҕарабыт. Истиҥ-эйэҕэс сүрэххит сөҕүрүйбэтин, этэҥҥэ эрэ сылдьыҥ», – диэн дьиэлээхтэр ыччаттарга махтанан алҕаан, сылаас, минньигэс астаах сандалыларыгар олордон чэйдэтэн ыыттылар.
Хаһаайка Светлана Афанасьевна дьарыга элбэх. Олортон биирдэстэринэн сибэкки арааһын сөбүлээн үүннэрэрэ буолар. Кини сыллата Билии күнүгэр оскуола үөрэнээччилэригэр букет буолар сибэккини босхо биэрэр үтүө үгэстээх. Биллэрии таһаардаҕына баҕалаахтар кэлэн ылан баралларыттан бэйэтэ үөрэр, астынар.
Анатолий Прокопьевич, Светлана Афанасьевна бэйэ аһынан-үөлүнэн хааччынаары сүөһүлэрин тутан олороллор, кыһыннары-сайыннары бэйэлэрэ көрөллөр.
Марелла Баишева.
