Н.В.Петров аатынан Дьабыыл нэһилиэгин агротехнологическай хайысхалаах орто оскуолатыгар ыам ыйын 26 күнүгэр оскуоланы бүтэрээччилэри олох киэҥ аартыгар үктэннэрэр Тиһэх чуораан бырааһынньыгар ыраахтан-чугастан эҕэрдэлии, алгыс тылларын тиэрдэ биир дойдулаахтара кэллилэр. Оскуоланы 2025-2026 үөрэх дьылыгар бүтэрээччи оҕолор үһүөлэр: Иван Киренскэй, Виктория Свешникова, Тая Тыртыкова. Кинилэри кыһыл дорожка устун онус кылаастан олох устун сиэтэн аҕалбыт кылаастарын салайааччыта Любовь Жиркова арыаллаан киллэрдэ.
Оскуоланы бүтэрээччи оҕолорго аналлаах үөрүүлээх тэрээһини оҕолор бастакы учууталлара, алын кылаас учуутала Фекла Канаева, дириэктэри иитэр үлэҕэ солбуйааччы Саргылаана Попова иилээн-саҕалаан ыыттылар. Долгутуулаах дьоро күн дойду Өрөгөй ырыатынан арылынна.
Быйылгы үөрэх дьылыгар оскуола алын сүһүөҕүн Снежана Михайлова салайааччылаах Сайнаара Климовская, Лера Лыткина, Уруйдаана Прокопьева, Уйгулаана Семенова, Влас Стручков, Дария Свешникова салайааччылаах орто сүһүөҕү Эрхан Баишев, Анита Цой, Ярослав Прокопьев бүтэрдилэр.
Оскуоланы бүтэрэр оҕолор көхтөөх уопсастыбанньыктар, үөрэххэ, успуорка, онтон да атын араас хайысхаларга ситиһиилэрэ үгүс. Иван Киренскэй комплекснай ыспартакыйаада баскетбол күрэхтэһиитин 1-кы миэстэ, улуустааҕы чэпчэки атлетикаҕа 3-с миэстэ, өрөспүүбүлүкэтээҕи иккис аһаҕас кэтэхтэн политехничэскэй олимпиада 3-с истиэпэннээх дипломана, астрономия биридимиэтигэр Бүтүн Арассыыйатааҕы олимпиада муниципальнай түһүмэҕэр 3-с миэстэ, комплекснай спартакиада волейболугар 2-с миэстэ, өрөспүүбүлүкэтээҕи үһүс “АроХимБио” олимпиада кыттыылааҕа.
Виктория Свешникова Г.В.Баишев – Алтан Сарын төрөөбүтэ 125 сылыгар аналлаах улуустааҕы “Ийэ тыл этигэн күүһэ” НПК бастакы таһымнаах үктэлэ, Бүтүн Арассыыйатааҕы “Хорсун-хоодуот сүрэхтэр”, “Кыайыы өйдөбүлэ”, “Төрөөбүт дойду кэрэтэ” оҕо уруһуйдарын, “Олоҥхо дойдутугар айан” өрөспүүбүлүкэтээҕи иккис аһаҕас кэтэхтэн күрэхтэһиилэрин, “Төрүт култуура” биридимиэт ааптара, суруйааччы И.Г.Баишев аатынан төрдүс төгүлүн ыытыллар кэтэхтэн олимпиада кыайыылааҕа, о.д.а. элбэх ситиһиилэрдээх.
Тая Тыртыкова “Профессионалы – 2024” идэҕэ уһуйуллуу күрэхтэһии муниципальнай түһүмэҕэр бастакы, эрэгийиэннээҕи түһүмэҕэр иккис, «Оһуор-мандар түһүлгэтэ» улуустааҕы быыстапка, технология биридимиэтигэр Бүтүн Арассыыйатааҕы олимпиада муниципальнай түһүмэҕин кыайыылааҕа, эрэгийиэннээҕи түһүмэҕин кыттыылааҕа, “Ларионовскай ааҕыылар – 2025” Бүтүн Арассыыйатааҕы НПК үһүс истиэпэннээх дипломана, о.д.а. үгүс ситиһиилэрдээх.
Оскуола дириэктэрэ Василий Петров оскуоланы бүтэрэр оҕолор тутуспутунан судаарыстыбаннай эксээмэннэргэ киирбиттэрин иһитиннэрдэ. Кини оҕолор төрөппүттэригэр уонна сыллата күүс-көмө, өйөбүл буолар бэпэчиитэллэргэ Махтал суруктары туттарда. Баһылык Дмитрий Петров сыллааҕы үлэлэр түмүктэринэн ситиһиилээх учууталларга грамоталары, Махтал суруктары туттарда, оҕолорго ситиһиилэри баҕарда.
Мэҥэ Хаҥалас улууһун биир кэлим диспетчэрскэй сулууспатын салайааччыта Афанасий Максимов улуус баһылыгын Махтал суругун старшай иитээччи Тамара Васильевна Жирковаҕа, улуустааҕы үөрэҕирии салаатын исписэлииһэ Рустам Кривошапкин ситиһиилээх үлэтин иһин Любовь Жирковаҕа грамота туттардылар. Оҕолору уон биир сыл устата ииппит-үөрэппит, киэҥ билиилээх дьон буолан тахсалларыгар олук уурбут учууталлара, олохтоох оскуола дириэктэрин үөрэх чааһыгар солбуйааччы Нюргуяна Жиркова, билии дойдутугар сиэтэн киллэрбит, ааҕарга, суруйарга, ахсаан суоттуурга үөрэппит маҥнайгы учууталлара Фекла Канаева, төрөппүттэр ааттарыттан Татьяна Тыртыкова оскуоланы бүтэрэр оҕолорго эҕэрдэ тыл бастыҥын анаатылар, улахан олоххо бэйэлэрин суолларын таба тайаналларыгар алгыс тылларын анаатылар.
Сыллата оскуоланы бүтэрээччилэргэ биир дойдулаахтара анал истипиэндьийэлэри олохтоон туттарар үтүө үгэстээхтэр. Бу күн Иван Киренскэй Аҕа дойду Улуу сэриитин бэтэрээнэ, Мэҥэ Хаҥалас улууһун, Дьабыыл нэһилиэгин бочуоттаах олохтооҕо Борисов Антон Ильич аатынан уонна Дьабыыл нэһилиэгин бочуоттаах олохтооҕо, өр сылларга оскуола сайдыытыгар элбэх сыратын биэрбит Пермякова Татьяна Петровна аатынан уола Петр Пермяков олохтообут истипиэндьийэлэрин тутта. Маны сэргэ, киниэхэ чекист Н.В.Петров аатынан истипиэндьийэни Ис дьыала Мэҥэ Хаҥаластааҕы салаатын Төҥүлүтээҕи оҕо быраабын харыстыыр иниспиэксийэтиттэн Христина Горохова, “Үлэ Кыһыл Знамята” уордьан кавалера, чөл олох хамсааһынын тэрийээччи, өр сылларга нэһилиэк сэбиэтин бэрэссэдээтэлинэн, олохтоох оскуола дириэктэринэн үлэлээбит, элбэх хоһоонноох ааптар Сергучев Иннокентий Егорович аатынан истипиэндьийэни кыра кыыһа Изабелла Попова туттардылар.
“Кэрэли” эбии үөрэхтээһин чэрчитинэн ситиһиилэрин иһин сибидиэтэлистибэ Тая Тыртыковаҕа туттарылынна. Маны сэргэ, кини өр сылларга математика учууталынан үлэлээбит, Дьабыыл нэһилиэгин бочуоттаах олохтооҕо, Мэҥэ Хаҥалас улууһун Бочуотун кинигэтигэр киирбит, СӨ үөрэҕириитин туйгуна, Учууталлар учууталлара, СӨ үтүөлээх учуутала Тимофеев Матвей Антонович аатынан итиэннэ олохтоох дьаһалта олохтообут истипиэндьийэлэрин тутта.
Виктория Свешниковаҕа Дьабыыл орто оскуолатыгар алын сүһүөх учууталынан үлэлээбит Фекла Романовна Игнатьева аатынан истипиэндьийэни кыыһа, Төҥүлүттэн Альбина Находкина, Г.В.Баишев – Алтан Сарын аатынан истипиэндьийэни аймаҕа, Чурапчы улууһун Алаҕар нэһилиэгин олохтооҕо Гаврил Оконешников, ону сэргэ, ССРС култууратын туйгуна, мусукаан Николай Гаврильевич Павлов 2-с аатынан истипиэндьийэни убайын оҕолорун ааттарыттан Төҥүлүттэн Елизавета Баишева туттардылар. Оскуоланы бүтэрээччилэргэ бэйэлэрин анал истипиэндьийэлэрин 1966 с. Дьабыыл 8 кылаастаах оскуолатын бүтэрбиттэр эмиэ туттардылар.
Майаттан Ньургуяна Тимофеева эһэтин, сэрии, үлэ бэтэрээнэ Михаил Яковлевич, эбэтин, СӨ тыатын хаһаайыстыбатын туйгуна Марфа Софроновна Артемьевтар ааттарынан истипиэндьийэни сыл бастыҥ төрөппүтэ Нарияна Березкинаҕа, аҕатын, үлэ бэтэрээнэ, Майа сэлиэнньэтин, Дьабыыл нэһилиэгин бочуоттаах олохтооҕо Яков Михайлович Артемьев аатынан истипиэндьийэни оҕолору тыа хаһаайыстыбатын салаатыгар уһуйар педагог Дьулустан Брызгаловка туттарда.
Аҕа дойду сэриитин кыттыылааҕа, үлэ, тыыл, РФ успуордун бэтэрээнэ, “Үйэ саас” бэлиэ хаһаайына Алексей Николаевич Березкин аатынан истипиэндьийэни уола, Мэҥэ нэһилиэгиттэн Николай Березкин дьиэ кэргэниниин чэпчэки атлетикаҕа улуус сүүмэрдэммит хамаандатын чилиэнэ, Дьокуускайга быйыл ыытыллыбыт өрөспүүбүлүкэтээҕи биирдиилээн бастыыр иһин күрэхтэһиигэ 400 миэтэрэҕэ 3-с миэстэ, 4х100 миэтэрэҕэ эстэпиэтэҕэ иккис миэстэлээх Урсун Романовка, СӨ Дархан уонна Үтүөлээх оһуохай этээччитэ Денис Оконешников анал истипиэндьийэтин 6-с кылаас үөрэнээччилэрэ Марк Канаевка, Айыллаана Федороваҕа, 8-с кылаастан Дарина Егороваҕа туттардылар.
Харда тылы оскуоланы бүтэрээччилэр ааттарыттан Виктория Свешникова этэн, уон биир сыл үөрэммит үөрэҕин кыһатын бары учууталларыгар, үлэһиттэригэр махтанна. Оскуоланы бүтэрээччилэр бэйэлэрин эҕэрдэлэрин үөрүүлээх тэрээһин кыттыылаахтарыгар “Быраһаай оскуолам” ырыанан тиэртилэр.
Бүтэһик чуорааны тыаһатар чиэскэ бастыҥ үөрэнээччи Тая Тыртыкова уонна бастакы кылааһы ситиһиилээхтик бүтэрбит Гоша Березкин тиксэннэр ураты лыҥкынас тыаһынан чугдаартылар.
Күндү оҕолорбутугар эксээмэннэрин ситиһиилээхтик туттаран, талан ылбыт үөрэхтэригэр кыһамньылаахтык үөрэнэн, төрөөбүт дойдуларыгар туһалаах дьон буолан тахсалларыгар баҕарабыт.
Марелла Баишева.
