Ыам ыйын 21 күнүгэр Төхтүр кулуубугар киэҥ ис хоһоонноох тэрээһин ыытылынна.
Аҕам саастаах дьоҥҥо аналлаах 15 куруһуок сыллааҕы ыытан кэлбит үлэтин отчуоттуур быыстапката, кэнсиэрэ бэрт үгүс киһини хабан,киэҥ ис хоһоонноохтук ыытылынна.
Ол курдук, сыл устата; «Оһуор иис» куруһуок, салайааччы Александра Артемьева, «Кыл,сиэл» ( Саргылаана Иванова), «Оҕуруо» (Анна Винокурова), «Туос абылаҥа» (Ирина Шергина), «Хатай» (Светлана Попова), «Далбар» үҥкүү ансамбла (Татьяна Говорова), «Дьиэрэй» фольклор (Анна Максимова), «Алгыс» үҥкүү бөлөҕө (Айталина Чикальдина), «Дьүрүйээнэ» ырыа ансамбла (Лилия Стручкова, Айсен Местников), «Дартс, кронхол» (Иван Жирков), «Хабылык, хаамыска» (Эмма Яковлева), «Дуобат, саахымат» (Николай Романов), «Сахаэтнофитнес» (Айталина Чикальдина),»Компьютерная грамотность» (Анастасия Романова, Полина Дмитриева), Драмкуруһуок (Аян Стручков), маны таһынан тэриллибитэ хаһыс да сыла буолбут «Скандинавскай хаамыы» (Дария Степанова, Ирина Шергина), «Фитнес» (Людмила Куркутова) ыытан кэлбит үлэлэрин туһунан салайааччы Анна Матвеевна Винокурова сиһилии кэпсээтэ. Дьоро киэһэ илии оҥоһуктарыгар сыл устата дьарыктаммыт дьон быыстапкаларыттан саҕаланна. Биир сыл иһигэр бэрт элбэх дьэрэкээн, көрбүтү эрэ сөхтөрөр араас матырыйаалтан чочуллан оҥоһуллубут симэхтэр, сахалыы хаһыаччыктар, туос ыаҕайалар, сиэдэрэй саахымат тигиилэр уо.д.а. көрдөрүүгэ турбуттар. Кэнсиэр иннинэ, Дьаҥхаады нэһилиэгин баһылыга, Алексей Никитич Шарин Үһүс көлүөнэ оскуолатын иитиллээччилэрин, нэһилиэк олохтоохторун дьоро күнүнэн, самаан сайынынан истиҥник эҕэрдэлээтэ, инникитин нэһилиэк тупсарын туһугар өссө күргүөмнээх үлэни, түмсүүлээх буолууну күүһүрдэр туһугар дьоһуннаахтык санаатын тиэрдэн, 65,70,75 саастарын туолбут үлэ бэтэрээннэригэр Эҕэрдэ суруктары, өйдөбүнньүк бэлэхтэри туттартаата. Сулустаах киэһэҕэ Мэҥэ Хаҥалас улууһун бэтэрээннэрин бэрэссэдээтэлэ Евдокия Саввична Решетникова Төхтүргэ 3-с көлүөнэ оскуолатын тэрийэн үлэлэтии улууска бастакы саҕалааһын буоларын бэлиэтээн туран, биир сыллаах дьоһун үлэлэрин сыаналаан, манна кыттыбыт бары аҕам саастаахтарга салайааччы Анна Винокурованы чорботон туран барҕа махтал тылларын кытта инникитин бу хамсааһын өссө күүскэ ыытылларын туһугар бэйэтин санаатын үллэһиннэ.
Үөрүүлээх тэрээһин 2-ч чааһыгар бары куруһуок кыттыылаахтара улахан кэнсиэри көрдөрдүлэр. Хас биирдии нүөмэрдэрэ дохсун ытыс тыаһынан доҕуһуолланна. Кэнсиэр бириэмэтигэр ырыалары байааҥҥа доҕуһуоллаабыт Константин Зыков төрөөбүт күнэ буолан мустубут дьон бары эрчимнээхтик ытыстарын таһынан эҕэрдэлээн үөрүүтүн үллэстэн аастылар. Инникитин, Дьаҥхаады Ытык дьоно оскуоланы, ыччаты кытта үлэлэһэр санаалаахтарын, атын нэһилиэк бэтэрээннэрин кытта көрсүһүүлэри, тэрээһиннэри былаанныылларын, улуус олоҕор актыыбынай кыттыыны ылыахпыт диэн биллэрэн туран, үлэлиир усулуобуйаны тэрийсибиттэрин иһин нэһилиэк дьаһалтатыгар, кулууп, бибилэтиэкэ, түмэл үлэһиттэригэр барҕа махталларын биллэрдилэр.
Августина Владимирова-Хабарова.
Төхтүр
