Чыамайыкыга
Тохсунньу 27 күнүгэр күн иккис аҥаарыгар отчуоттуур бөлөх Даркылаах нэһилиэгэр тиийдэ. Мунньаҕы нэһилиэк баһылыга Александр Захаров салайан ыытта. Улуус баһылыга Дмитрий Тихонов 2023 сыллаах үлэтин бары салааларынан киэҥник сырдатта.
Ааспыт сылга 12 боппуруос турбутуттан 3 туолбут; бөрө боппуруоһун быһаарыыга үп көрүллүүтэ, уу таһар массыына ылыыта уонна дымовой турбалары уларытыы, 7 боппуруос үлэҕэ сылдьар.
Отчуоту истэн баран бочуоттаах сынньалаҥҥа олорор Егор Семенов, Михаил Захаров, Павел Семенов, орто оскуола дириэктэрэ Любовь Романова долгуйар боппуруостарынан кытыннылар. Элбэх ыйытыы суругунан киирдэ.
“Чүүйэ” МУТ субан сүөһүтүн сайын мэччирэҥҥэ сайылыкка аҕалар дуо, Даркылаахха уот лииньийэтэ боробуоттан хаһан сип кабелга уларыйарый, Хочо балыыһата тоҕо сабылынна, терапевт быраас кэлэн көрөрө наада, аптекаҕа эмп кэлэр дуо, дьыалабыай маска ордер ылаары Майаҕа, Аллараа Бэстээххэ барарга биэнсийэлээх дьоҥҥо айан төлөбүрэ ыараханын, ону миэстэтигэр быһаарарга көмө, “Таҥхаҕа” турар вагону суох гынарга, алмаас боппуруоһугар бэйэбит туспутугар харыстанар көмүскэл толкуйдуохха, скважина боппуруоһа ханна тиийдэ, күһүҥҥү өртөөһүнү миэстэтигэр 6-7 киһилээх хамыыһыйа туруоран быһаарарга үлэни ыытарга, 2019 сыллаахха туттарыллыбыт үүт харчытын иэһин туһунан, бөрө элбээһинин утары охсуһар ньыма быһыытынан итиэннэ айылҕа кыылын эспэт сыалтан туйахтаах кыыл лиссиэнсийэтин 1 ыйынан болдьохтоон көҥүллүөххэ, тыа хаһаайыстыбатыгар ыччаты таһаарар ньымалары толкуйдуохха, ынах сүөһү иитэр дьон сааһыран иһэринэн, сүөһү ахсаана салгыы аччаабатын наадатыгар “Тамма” кэпэрэтииби үлэлэтэргэ, о.д.а. ыйытыылар уонна этиилэр киирдилэр.
Маны сэргэ, оскуолаҕа каадыр боппуруоһа күүскэ турарынан үөрэммит каадыр, саатар, 5 сыл идэтинэн үлэлиирин ирдиэххэ диэн эттилэр, эдэр исписэлиистэр кэлэллэригэр дьиэнэн хааччыйыы боппуруоһун быһаарарга 4 кыбартыыралаах уопсай дьиэ өрөмүөнэ ыытылларыгар көмө көрүллэригэр туруорустулар, «Хаарбах дьиэттэн” көһөрүү бырагырааманан 3 уопсай дьиэ докумуоннарын экспертизалара хайаспыттарын ыйыттылар.
Быйылгыттан кэтэх хаһаайыстыбаларга сүөһү төбөтүгэр бэриллэр харчыны хаһаайыстыба сайдыытыгар туттубуттарын отчуоттуур буолалларынан чектэрин мунньа сылдьалларыгар этилиннэ. Салайааччылар олохтоох дьон мунаарар боппуруостарыгар чопчу эппиэттээтилэр.
Ил Түмэҥҥэ сир сыһыаннарыгар, айылҕа баайыгар уонна экологияҕа сис кэмитиэт бэрэссэдээтэлэ Андрей Находкин айылҕа боппуруостарыгар, бултааһын боппуруоһугар туһааннаах үлэ ыытылларын бэлиэтээн туран, нэһилиэнньэттэн боппуруос турбутунан экология министиэристибэтигэр болҕомтолорун ууралларыгар үлэлэһиэм диэтэ. Улуус дьокутааттарын сэбиэтин бэрэссэдээтэлэ Иннокентий Андросов бэйэтин этиитигэр олохтоохтор олорор сирдэрин, айылҕаларын харыстыылларыгар, улуус баһылыга Дмитрий Иванович анал байыаннай дьайыыга сылдьар дьоммутугар көмөлөрүн иһин олохтоохторго махталларын тиэртилэр.
Отчуоту 57 киһи иһиттэ.
Марелла Баишева.
