Атырдьах ыйын 6 күнүгэр нэһилиэнньэ дьарыктаах буолуутун улуустааҕы киинин кытта сөбүлэҥ чэрчитинэн Чурапчытааҕы судаарыстыбаннай физическэй култуура уонна успуорт института уонна Чурапчытааҕы аграрнай-техническэй колледж тутар хамыыһылайара Майа сэлиэнньэтигэр Аһаҕас аан күнүн ыыттылар.
Бу үөрэх кыһаларыгар 9-с, 11-с кылааһы бүтэрээччилэр, үлэтэ суохтар, эбии идэ ылыан баҕалаахтар, оҕолорун көрөн олорор дьахталлар, анал байыаннай дьайыы кыттыылаахтара уонна дьиэ кэргэннэрэ докумуоннарын туттаран, орто анал уонна үрдүк үөрэхтэргэ киириэхтэрин сөп.
Тутар хамыыһыйалар бэрэстэбиитэллэрэ Аһаҕас аан күнүгэр кэлбит дьоҥҥо үөрэх хайысхаларын, туох докумуон туттаралларын быһааран, сүбэ-ама биэрдилэр.
Чурапчытааҕы судаарыстыбаннай физическэй култуура уонна успуорт институтугар успуорт, физическэй култуура, социальнай үлэ, педагог идэлэригэр орто анал уонна үрдүк үөрэҕи ылыахха сөп. Устудьуоннарга анаан былырыын 240 миэстэллээх уопсай дьиэ тутуллубута. Манна үөрэниэн баҕалаахтар докумуоннарын орто анал үөрэххэ атырдьах ыйын 16 күнүгэр, үрдүк үөрэххэ атырдьах ыйын 25 күнүгэр диэри туттарыахтарын сөп диэн биһиэхэ Чурапчытааҕы ГИФКиС тутар хамыыһыйатын эппиэттиир сэкирэтээрэ Мария Оконешникова иһитиннэрдэ.
Чурапчытааҕы аграрнай-техническэй колледжка газ, электроуот, ититии ситимнэрин, тутуу, сыбаарка, тыа хаһаайыстыбатын тиэхиникэтин, массыынаны үлэлэтии уонна өрөмүөннээһин, технолог, агроном, бэтэринээр идэлэригэр үөрэтэллэр. Тутар хаамыһыйа докумуоннары атырдьах ыйын 25 күнүгэр диэри тутар. Ыраахтан кэлбит үөрэнээччилэргэ уопсай дьиэҕэ 200 миэстэ көрүллэр. Колледж ХИФУ-ну кытта дуогабардаах буолан, устудьуоннар орто анал үөрэҕи бүтэрэн баран салгыы үрдэтинэ барыахтарын сөп. Тыа сиригэр наадалаах идэлэри баһылыы бу үөрэх кыһатыгар кэлэллэригэр Чурапчытааҕы АТК тутар хамыыһыйатын сэкиритээрэ Елена Шадрина ыҥырда.
Дьарыктаах буолуу киинин салайааччыта Федор Белолюбскай саҥа идэлэри баһылыан баҕалаах улуус олохтоохторугар киин куоракка буолбакка, чугас эҥэр баар, үөрэнэргэ, олорорго сөптөөх усулуобуйалаах үөрэх кыһаларыгар киирэн идэ ылалларыгар баҕа санаатын эттэ.
Иван Лукин.
